Meghalaya deh cyber fraud

Agencies, 25 November: Aji kali mani khan technology deh besi dependent hoijai aro ami khan laga besi phak din toh internet deh phalai. Internet jola sob manu khan logode cyber fraud hobole ektum risk ase. Jowah hapta phali police records hesab deh, Meghalaya jaga deh jar jun manu logode fraud howah cases khobor paise. November 21 deh, Muanthang Valte pora complain kora toh, tai kaam nemide Naukri.com via OLX website deh apply korise aro tai logodebe tuita manu (1) Akash Verma aro (2) Vivek Kumar pora contract korise. Etu tuita pora tai logode HDFC Bank deh Rs. 25,499 deposit koribole janaise. Aro last deh etu tuita pora tai logode dhokaideya janipaise. Arobe November 22 time deh Rama Ramana Padhy, Assistant General Manager, SBI RASMECC, Shillong pora complaint kora toh, ekta Firuza pora vehicle loan toh commercial jolabo karni SBI Rynjah Branch pora loise. Hoilebe etu loan lowah manu pora Bank logode RC aro Insurance copies debole fail hoise. Bank pora ketya agent logode gari toh korailobole janaise, tai khan gari toh Manipur jaga deh tusara naam pora register hoikena bekhaideya thakise. Etu din dehhe ekta manu Mohan Mahato pora complain kora toh, tai Dubai / Saudi Arabia laga ticket aro Visa nemide ekta Javed Akhtar Siddiqui logode Rs. 75,000 dese. Hoilebe tai pora etu kaam toh koranai aro poisa be koraideya. November 20 debe Amit Nath logode tuita online log powah manu pora Rs. 1,61,000 dhokaideya thakise.