Aizawl, March 28 : Thursday din te, Mizoram laga Vanapa Hall te Congress party laga MP election campaign kickoff program hoisey.
MPCC President Lalthanzara para koisey ki Mizo manu khan tu BJP government laga under te suraksit nai. Poila laga Congress party leader khan para Indian Constitution under te dhorom laga azadi di thakisey taki sob jati laga manu khan para taikhan laga dhorom tu khusi para manibo paribo. BJP government para etu azadi ke hataidibole kosis kuri asey.
Manipur te, government employee khan Good Friday aro Easter Sunday te office jabole lagi asey. Mizoram Synod para bi Income Tax te Rs 25 billion poisa pay kuri asey.
Lalthanzara para agey barikina koisey ki etu anyay aro disrespectful harkat khan tu poila kitya bi huwanai. Aro koisey ki United States aro Germany para bi Kejriwal ke arrest kora laga khilaf te awas uthaisey.
Etu Congress party President para tailaga bhasan te Congress government laga homoitey Mizoram te huwa development project jaiseki hydel project, hall aro sports grounds, medical college, airport aro NLUP khan highlight kurisey.
Congress Party MP Candidate Lalbiakzama para koisey ki RSS aro BJP tu India te ekta Hindu kingdom banabole kosis kuri asey kuntu tu desh te boha minority khan nimitey bhal nai.
Tai para The Forest Conservation Act 2023 laga bi kotha koisey kuntu tu tailaga hisap te Mizoram laga zameen loilobole laga ekta rasta asey. Kuntu tu tailaga hisap te ekta disadvantage asey kilemaney Mizoram laga duita international border asey.
Lalbiakzama para koisey, “Article 371(G) laga hisap te Indian Parliament para amikhan laga desh ke loilobole naparey, BJP government para amikhan laga haath para etu loilobole kosis kuri asey.”
Agey barikina, etu Congress MP candidate para koisey ki NDA government laga under te, Electoral Bond khan laga galat istamal kurisey, Income Tax Department aro Enforcement Directorate khan ke party kuribole nimitey dhomki dikina poisa lobole cholaisey aro press laga azadi ke bhangaisey aro courts khan ke control kuri asey.
Tai para koisey, “Judi amike MP elect kurisey koiley, ami para development laga kaam tu environment te eku badha ahibole nidikina hobole dibole kadam uthabo.”
MPCC Vice President aro Campaign Committee Chairman Lalnunmawia Chuaungo para koisey ki etu saal laga Lok Sabha election para India laga manu khan ke democracy(manu khan laga hisap te chola sarkar) nohoilebi autocracy(hukum dikina chola sarkar) banabole laga choice dibo. Aro koisey ki amikhan laga choice laga natija tu amikhan laga opor te giribo.
Chuaungo para kosiey ki Central BJP leader khan tu shaktishali, character thaka aro dusra nimitey bhabna kora khan asey. Tai nijor bi bisi saal nimitey BJP government laga under te kaam kurisey. Aro tai etu janey ki taikhan tu bhal kaam kora te tagra asey aro biya kaam kora te bi tagra asey.
Add Comment