Aizawl, April 22 : Ekjun senior election official para Sunday din te koisey ki Mizoram Lok Sabha polls te chola sob Electronic Voting Machines (EVMs) ke seal kurikina strict nigrani rakhikina strong room khan te rakhidisey. Vote laga ginti tu June 4 te hobole asey.
Mizoram laga ekta Lok Sabha seat nimitey election tu April 19 te hoisey.
Mizoram Additional Chief Electoral Officer H. Lianzela para koisey ki EVM aro Voter Verifiable paper audit trail (VVPAT) machine khan ke polling officials khan para Friday aro Saturday din te sob voting station para anikina Aizawl aro alag 10ta district headquarter te laga strong room te rakhidisey.
Tai para koisey ki Mizoram te 40 strong room asey. Sob voting huwa jaga nimitey ekta-ekta. Aro etu strong room khan ke security forces para guard kurikina asey taki etu logotey kun bi khili-mili kuribo naparibo aro kun bi gairkanooni tarika para etu room te gusibo naparibo.
Tai para koisey, vote tu desh laga alag rajya khan logotey June 4 te ginti kuribo.
Election department para 13 voting centre khara kurisey, Aizawl te 3ta.
Vote ginti kuribole nimitey 40 hall asey. Sob jaga nimitey ekta ekta.
EVM aro VVPAT laga post-poll(voting huwa picheyte kora) jaanch tu Saturday din te hoisey.
Election department para koisey ki Mizoram laga Lok Sabha Polls te 56.78% voting record hoisey, postal ballot aro Electronically Transmitted Postal Ballot System (ETPBS) ke charikina.
Etu election te Mizoram para 6jun candidate, ruling Zoram People’s Movement (ZPM), main opposition Mizo National Front (MNF), Congress, BJP, People’s Conference (PC) party para ekjun-ekjun candidate aro ekjun independent candidate contest kuri asey.
Add Comment