July 16, 2023 : East police station laga police khan toh itu Nagaland laga Dimapur district tey, 110 mobile phone toh bisari kena phone malik ke wapas dishey, kuntu toh hoiley hari kena thakishey nahoiley chor hoi kena thakishey
Itu pai-ja phone khan toh hoiley kun thik malik asey tai khan ke wapas kuri dishey, koi asey, Dimapur commissioner of police Kevithuto Sophie para ekta programme tey, kuntu toh hoiley itu east police station para organize kurishey, tai laga office laga conference hall tey, Saturday tey, police laga source khan para koishey, Sunday July 16 tey.
Itu programme ke address kuri kena Sophie para koishey mobile phone toh hoiley ajikali laga homoi tey bishi jaroori thaka jeenis asey hoilebi itu toh kitya alag manu laga haat tey punchi jai – bishi risky hoi jai, manu khan toh tatey para phone malik laga phone bhitor tey ki asey sob loi loboley pari asey information khan aru kiba important laga kiba thakilebi loi loboley pari asey.
Eneka hoa para he fraud khan hoi thakey, manu laga identity khan chor hoi thakey aru alag cybercrime khan bhi hoi thakey, tai para koishey.
Sophie para sob ke aru-janaidi asey mobile phone chulai thaka manu khan ke, bhal para security lagai kena chulaboley, eneka hoiley he kun para bhi chor kuri kena misuse nakuribo.
Tai para sob ke, police logotey ahi kena information khan bhi share kuribi koi asey – ki laga crime hoi thakey kun laga locality tey hoilebi, eneka hoiley he eneka kiba kibi ghatna hoboley thaka toh rukhaboley paribo, koi kena koishey.
Add Comment