Headlines

Nagaland te Constitution Day manaise

November 26, 2018

Constitution Day koi kena 26th November 2018 te manaise. Etu din te Chief Secretary, Nagaland R. Binchilo Thong, IAS pora Pledge aro bhal kotha kan kuridese aro janaidese. Tai bi etu Constitution te ami kan desh laga asul bhal babuna kana se aro etu pora ami kan Desh laga Constitution toh pachaidekena ahkete luijaidebole kuri ase koi kena janaise. Aro etu Constitution of India toh ami kan neju jaka laga ekta Fundamental Law ase koi kena janaise. Etu din te kotha kurikena President, High Court Bar Association, Ashiphri Zho pora etu Indian Constitution toh ekta bhal laga ase. Aro ami kan desh laga manu kan nemite ekta motub aro husa laga ase koi kena janaise. Tai bi etu Indian Constitution te 2 ta asul Sorkar Organs ase. Etu ke Executive, Legislature aro Judiciary kana se. Aro etu porahi ami kan Indian Constitution toh ami kan desh laga neju manu kan nemite ekta Supreme Law ase aro etu porahi ami kan sob logot aram aro shant pora thakibole de ase koi kena janaise.Senior Additional Advocate General, T.B. Jamir porabi etu din te kotha kurikena etu Constitution Day toh kinika huikena  kam te julabole kurikena aha laga ase etu kan janaide thakise. Etu ke tai 2015, 26th November dak etu din toh “Law Day” koi kena manai thakise. Huilebi 2015 sal majutte hi India Sorkar kan kotha melai kena etu din edia toh Constitution Day koi kena manabole kotha mana kura laga ase. Etubi Constitution of India laga naam pora. Etu karne tai bi sob logot etu Constitution ulabole kura manu kan ke ekta hisab aro bhal adat dekhaidebole kuribi. Aro etu Constitution toh ahkete anedebole kuribi koi kena janaise.Nagaland Governor nemite Home Commissioner aro Commissioner & Secretary karne thaka Ramakrishnan, IAS porabi etu din te kotha kurikena Vote of Thanks janaidese. Etu ke tai ami kan Nagaland Governor, Shri PB Acharya pora ami kan state Sorkar ke etu din toh ekta bhal adat aro hisab pora manabole kuribole janaidiya laga ase koi kena janaise. Etu din laga Programme te Advisor Law aro Justice, Dr. Longrineken, Administrative Head of Departments, Head of Departments aro tusera Representatives kan alak-alak Organisations laga kan ahe kena thakise koise.