January 15, 2025, 05:44 PM: Angami Public Organisation laga President – Thejao Vihienuo para itu Poanglüm Hornbill Festival 2025, Lamshok (Peace Treaty) laga 2nd Din ke grace kurishey, tai tatey Special Guest hisap buhi kena aru MLA Imtichoba Chang toh Festival Host hisap thakishey, Tuensang laga Parade Ground tey para, 14th January, 2025 tey.
Itu occasion tey kotha kuri kena, Thejao Vihienuo para tai khushi pawa laga express kurishey, Chang aru Angami community ke eke logotey aha dikhi kena, ekta historical shanti laga treaty nimitey. Tai para yaad kurishey, ekta Angami family kuntu toh hoiley Tuensang tey thakishey, poila 1940s tey, tai khan para utu homoi tey close relationship dikhai kena, itu Chang aru Angami tribe khan majetey. Tai para state kurishey Poanglüm 2025 toh hoiley ekta milestone asey, itu duita community khan nimitey aru tai para aru-bhi assure kurishey, itu Chang Community ke, ki, judi kiba kibi dikhdari khan ulaishey koiley, itu Angami Area tey, itu Angami Public Organization toh hoiley khushi para modod kuriboley tyaar asey.
Tai para itu bhi koishey ki, Chang khan toh hoiley sob para bishi humble aru shanti bisara laga community asey aru bisas kuri asey, ki, itu friendship itu duita community khan majetey toh hoiley itu din para aru bhi majbut hoi kena jabo koi kena.
Itu programme pichetey, Cultural Show aru ekta indigenous Top Spin kuria laga Game, Gogona, Gahuri mangso khawa laga competition aru jui banawa laga kurishey. Itu evening session toh hoiley Mr. aru Miss Chang 2025 chhani loi kena, khotom hoishey, kuntu toh hoiley, ‘Lanshedbü Müttao’ logotey kuria laga thakishey.
Add Comment