New Delhi, October 25 : Punjab laga Firozpur fale jai thaka Patalkot Express laga komsikom duita dabba te Agra aro Jhansi laga majotey tahka Bhandai station osor te jui lagisey. Etya tak 13 manu jokhom huwa laga report olaisey.
Deputy Commissioner of Police (DCP) Agra West Sonam Kumar para confirm kurisey ki 13 manu jokhom khaisey.
Kumar para koisey, “7 jun manu laga gao te jola laga jokhom paisey hoilebi etu jokhom tu eman dangor nohoi. Taikhan ke SM Medical College and Hospital laga emergency ward te ilaj kurisey. Aro baki 6jun manu kun ke chutu mutu jokhom paisey taikhan ke utu jaga osor te thaka ilaj kora jag ate admit kurisey kotey etu train rukhisey.”
North Central Railways laga PRO Agra Zone, Prashasthi Srivastava para koisey, “ Etu train laga duita dabba te jui lagisey hoilebi sob 4ta dabba ke etu duita dabba para jui spread hobole laga bhoi para alag kuri disey.”
Srivastava para kosiey ki etu ghotna huwa jag ate 5ta maan fire brigade pungchisey.
Tatey Ambulance bi pungchisey.
Doorgami Express koikina aro ekta train tu etu juli thaka train laga track laga next te rukhisey aro bisi passenger khan ke etu train laga modod para etu jaga para uthaikina loijaisey.
Tai para koisey ki etu jag ate technical expert khan logotey senior official khan bi thakisey aro duita dabba te jui jola laga exact karon tu etya bi janibole baki asey.
Add Comment