September 17, 2020. Russia laga experimental COVID19 vaccine Sputnik V lowah beche, 7 volunteers pithor te 1 jun para side effects ase complained korishe, etu oper te komjur hoi aro muscle pain ase koishe. Etu khobor toh Russian health minister Mikhail Murashko para janai thishe. Etai dak te 40,000 volunteers junai deya te 300 oper manuh para Sputnik V vaccine toh loikena ase, koikena TASS news agency para kowah Murashko para janai thishe. “sob melaikena 14% neshina komjur laga complaints ase, 24 ghonda muscles pain ase ketaiba body temperature uthi thaki” koikena Wednesday din te Murashko para kowah Moscow Times janai thishe. Russian minister para koishe ke, anti-Coronavirus vaccine laga injection toh lowah beche symptoms toh next din te “level off” hoijai. Minister aro koishe ke, “dhuk baboli toh instructions te ase aro koboli parai laga ase”. Volunteers khan aro adenovirus-based viral vector vaccine second shot loboli rokiase, first shot lowah beche 21 din thakina loi koishe. Sputnik V toh aro large-scale clinical trials kotom hoboli baki ase koishe. Jaa moina te Russian government para approval kora beche Sputnik V toh Duniyaa pithor te manuh ke thiboli first COVID-19 vaccine ase koishe. Etu moina olop din agae, Moscow te Sputnik V vaccine laga final clinical trials soruh hoikena ase. Hoilebi, scientist khan para vaccine toh oshari para jabole koishe, keli koile etu vaccine toh full safety aro efficacy checks kora kotom howah nai. Russian health minister para koishe ke, India logot Sputnik V vaccine thibo aro clinical trials toh pharmaceuticals major Dr Reddy’s Laboratories logot agreement bonaishe koishe. Hoilebi, etu kam toh the Drugs Controller General of India (DCGI) para clear koriboli ase koishe. Russian Direct Investment Fund (RDIF) para koishe ke, India te regulatory approval kora beche Dr Reddy’s logot vaccine toh 100 million doses neshina supply thiboli ase. Wednesday din te, RDIF para vaccine toh safe ase janai thishe.
Add Comment