SAFF Cup: India jetise Sri Lanka logode

Agencies, 6 September: Wednesday din SAFF Cup football tournament de, India toh Sri Lanka logode 2-0 pora jeti kena tournament suru korise. India toh khel ektum gara pora suru howah thakise. India laga khelkari Ashique Kuruniyan aro Lalianzuala Chhangte pora 35^th aro 47^th minute de goal thala karni 2-0 pora jetibole parise. Group B de India 3 points pora 1^st position de ase. Aro India laga neji de, Maldives aro Sri Lanka toh 2^nd aro 3^rd position de ase. Sunday din India toh Maldives logode khelibole ase aro kali (Friday) Sri Lanka toh Maldives logode khelibole ase. Thursday de, Group A laga Nepal aro Bhutan khela Nepal jetise 4-0 pora. Nepal laga khelari Ananda Tamang (21), Sunil Bal (71), Bharat Kawas (79) aro Nirajan Khadka (88) pora goal thali-kena jeta thakise. Etu time de Bhutan laga khelari NimaWangdi toh 69 minute de red card powah thakise. Group A table de 6 points pora Bangladesh 1^st position de ase aro Nepal, Pakistan aro Bhutan 2^nd, 3^rd aro 4^th de ase. Aro Thursday din tusara Group A match de Bangladesh aro Pakistan khela thakise. Etu khel de Bangladesh 1-0 pora jeta thakise. Bangladesh laga khelari Topu Barman pora 85 minute de goal thali-kena jeti-lowah thakise.