Gangtok, April 17 : Sikkim te 32 assembly seat aro ekta Lok Sabha constituency nimitey campaign chuli thaka tu Wednesday din te khotom hoisey aro sob party khan para Sikkim te vote dibole thaka manu khan laga mon jitibole nimitey akhri kosis kuri thakisey.
Officials para koisey, Sikkim Assembly aro ekta Lok Sabha seat nimitey campaigning kora tu 5PM te khotom hoisey. Sikkim laga election tu April 19 te hobole asey.
Sikkim laga Chief Minister Prem Singh Tamang, kun Sikkim Krantikari Morcha (SKM) ke lead kuri asey tai tu Sikkim te aro second bar power te ahibole kosis kuri asey. Tai tu tai contest kuri thaka Pakyong district laga Rhenock assembly constituency te tailaga campaigning kora tu khotom kuridisey.
Tamang tu Sreng-Chakung constituency para bi contest kuri asey. SKM tu sob 32 Assembly seat te contest kuri asey.
Etu 56 years laga SKM leader para tailaga campaigning kora ke high note te khotom kuribole nimitey Rhenock te ekta car rally lead kuribole nimitey bhagwan laga asirvad lobole Sai mandir visit kurisey.
SKM tu Chief Minister laga nine-point guarantee te ekta approval bisari asey, maiki khan aro samaj laga alag section laga manu khan nimitey welfare measure aro 27,000 opor temporary employee laga service regular kuridiya.
2019 laga election te, SKM para 17 seat jitikina Sikkim Democratic Front laga 25 saal laga rule ke khotom kuridisey.
Opposition Sikkim Democratic Front (SDF) president aro 5 bar Sikkim laga Chief Minister huwa Pawan Kumar Chamling para tailaga native Namchi district te Poklok-Kamrang assembly laga voter khan logotey baat-chit kurikina tailaga campaigning khotom kurisey
Chamling tu Gangtok district laga Namcheybung assembly constituency para bi contest kuri asey.
Add Comment