New Delhi, May 07 : Singer Ananya Birla para announce kurisey ki tai tu tailaga pura energy ke business laga duniya te dhalibole nimitey tailaga music career ke chari asey. Ananya para Monday din te instagram te tailaga fans aro follower khan logotey etu decision share kurikina ekta note likhisey. Aro enaka kurikina bisi manu ke emotional kuridisey. Tai para etu bi koisey ki tailaga business balance kora aro music te focus kora tu tai nimitey enaka mushkil hoiasey ki tai express kuribole naparikina asey.
Ananya para enaka koisey, “Guys, etu tu sobsey mushkil decision thakisey. Ami enaka stage te pungchisey kotey ami para chola aro etya agey baraithaka business aro etu logotey music duita ke bi ekeylogotey balance kuribole namunkil hoi asey. Aro etu para amike eman dukh di asey ki ami express bi kuribole naparey. Ami para jaija saal khan te release kora music ke morom diya nimitey dhanyabad. Ami para akha kuri asey ki ekdin amikhan para amikhan laga nijor manu para bana English gana ke appreciate kuribole paribo. Kilemaney amikhan laga nijor desh te bisi talent asey.”
Tai para arobi enaka koisey, “Aro ekbar dhanyabad. Etya homoi ahisey ki ami para amilaga sob energy tu business laga duniya te dhalibo. Tailaga etu post te Armaan Malik, Bobby Deol aro Sania Mirza para react kurisey.
Ananya Birla laga first gana ‘Livin’ the Life’ tu 2016 te release hoisiley. Tailaga next gana ‘Meant’ tu July 2017 te release hoisiley. Etu picheyte 2018 te ‘Hold On’ release hoisey. July 2018 te tailaga fourth gana ‘Circles’ release hoisiley aro 2019 te tailaga fifth single gana ‘Better’ release hoisiley.
Recently, Ananya Birla tu Lucy Ali aro Armaan Malik logotey ‘Do Aur Do Pyaar’ film laga soundtrack laga hisa thakisey. Etu film te Vidya Balan, Pratik Gandhi, Illeana D’Cruz aro Sendhil Ramamurthy asey.
Add Comment