KOHIMA, NOVEMBER 28 : Wednesday din Civil Secretariat Complex, Chief Secretary’s Conference Hall jaga deh State government kan 15th Finance Commission logode meeting thakise. Chief Minister, Neiphiu Rio pora Fifteenth Finance Commission laga Chairman, Member aro Officials khan logode welcome kora thakise. Meeting time deh tai pora State khan dekthari pai thaga laga kunbah important issues highlight kora thakise. Tai pora kowah toh, Nagaland laga revenues othabo karni Government of India pora Consolidated Fund of India olabo lagibo. Tai pora State financial position toh asti-asti ektum beya hoi ase aro development activities deh dekthari pai ase koise. Etu toh Government of India pora funds grant nakora karni ase koise. Tai pora Thirteenth Finance Commission laga normative approach deh Special Category status aro any special grant nahoile treatment namana pora state deh dekthari paise. Aro state toh employees khan logode pay aro allowances toh thek time deh debole napari kena dukh paise koise. Thirteenth Finance Commission kothom howah time deh liabilities of works be melikena dangor budgetary Rs. 1811.85 crores toh namise, hoilebe paid kora nai. Tai pora aro kowah toh, 32% pora 42% States logode 10% tax devolution othaideya pora be horu state, besi phak Nagaland logode motob powah nai. Tai pora Commission logode request kora toh, Special Category States nemide 25% States laga share othabole janaise. Kelay koile Fourteenth Finance Commission time deh States logode 11.53% dekena thaga naponja karni. 25% laga deh 3% toh Nagaland nesana geopolitical implication thaga state khan logode debo pari. Tai pora kowah toh, State khan CSS aro flagship schemes nemide State Share laga 10% deh-ase. Etu pora Central Share laga 90% toh etu schemes nemide par hobo napari aro etu pora State laga infrastructure development ke dekthari pai kena ase. Tai pora Fifteenth Finance Commission logode CSS aro Flagship Programmes laga fund nemide 100% Central Grant koribole janaise. Etu toh 16 Point Agreement deh plan korikena ase. Rio pora be aro janaideya toh, ami khan laga state financial pora dukh pai thaga toh fund ola namija pora ase. Tai pora be first sal time deh resource control thaga pora State toh thek pora infrastructure thakibole napari kena dekthari paise koise. Besi phak government laga building khan toh 50 sal pora be besi khan ase. Tai pora kowah toh, Jaija 10-sal time deh Government pora Rs. 389 crores toh 33 notun Directorate buildings aro purana building putli kora deh jaise koise. Etu toh HUDCO pora Negotiated Loan hesab deh besi interest dehkena bona laga ase. Etu pora state laga financial deh dekthari paise. Tai pora be kowah toh, pahar area laga state howah karni hotai rasta toh sabole olai. Hoilebe financial komchor howah karni rasta toh repair koribole napari aro thek pora rakhibole napari. Fifteenth Finance Commission tak karni infrastructural assets deh total fund toh Rs. 3458.00 crores jolai kena ase. Tai pora be 14 notun infrastructure development works deh kelaaf kori kena notun infrastructure nemide fund toh Rs. 7212.10 crores lagi koikena janaideya thakise. Tai pora be Commission logode khobor janaideya toh, Fourteenth Finance Commission laga tui-sal bachi kena thaga salary besi lagibo. Kelay koile State Government pora 7th Pay Commission mana karni aro etu toh 1st January 2018 pora suru hoise. Nagaland pora employees nemide Central Pay pattern lowah be loise, etu pora State employees nemidebe 7th Pay Commission recommendations toh ektum lobole olaise. Etu par 2018-19 ekala deh ekta Rs. 1272.00 crores toh pay revision deh ase. Second issue toh, Right to Education Act (RTE) thek hobo karni 1620 Primary Teachers aro 1527 Graduate Teachers toh Sarva Shiksha Abhiyan (SSA) pethor deh aro 931 Subject Teachers toh Rashtriya Madhyamik Shiksha Abhiyan (RMSA) pethor deh junise. Etu teacher khan logode recruitment examinations pora regular basis hesab deh junise aro tai khan logode hotai salaries deh-ase. Hoilebe Samagra Shiksha Abhiyan (SMSA) laga notun integrated scheme pethor deh tai khan laga salaries toh 1st April 2018 pora adha-phak namaidese. Aro tai khan logode poisa nama ke dukh kori thakibole janaidese. Rio pora be Finance Commission logode ami khan laga tribal heritage, traditions aro culture bachai kena rakhibo karni estimate Rs. 120 crores lagi thaga saidebole janaise. Aro etu opor deh State laga capital deh airport nathaga laga kotha be janaideya thakise. Tai khan logode airport bonabo karni 645.20 acres lagi ase aro state pora lagi thaga deh log koribo karni 398 acres nesana toh kaabja korikena ase koise. Suru kotha toh Addl. Chief Secretary, Finance, Temjen Toy, IAS pora kora thakise. State government pora Power point kora thakise. 15thFC laga chairman, Nand Kishore Singh pora kotha khan kora thakise.
15th Finance Commission nemide dinner aro culture show
15th Finance Commission laga Chairman, member aro officials khan ahha pora ektum kushi pai kena state pora dinner aro cultural show toh Chief Minister laga office residence, Banquet Hall jaga deh loise. 15th FC laga chairman Dr. N.K Singh pora Chief Minister aro tai laga government logode eku kushi powah kotha janaideya thakise. Kelay koile Nagaland toh mixed up laga group hoikena ektum alag-alag thaga bechidebe ektum unity thaga karni. Tai pora be state government toh Nagaland manu laga future phal hobo nemide lead hoikena agae jabo lagibo aro age deh dangor opai rokhikena thaga deh log koribo karni besi lamba rasta ase koikena janaise. Tai pora be aro janaideya toh, resources ektum komti hoi kena thakise koilebe Nagaland toh dangor hoi ase. Tai pora be Finance Commission laga duty toh state phal koridebole ase koise. Etu pora constitutuin framework pethor deh key-key koribole pari sob koridebo koikena janaise. Commission toh state government pora share kora bechide join hobole ase aro infrastructure laga quality phal hobo karni key-key activites besi koribole ase. Aro maike khan logodebe mani bole ase. Tai khan thaki kena state toh phal hoijabo karni. Etu commission pora be Nagaland laga development deh motob koribole ase aro tai khan state laga destiny deh biswas kori thaga yaat koribo karni government logode manibole ase. Commission pora be challenged deh halka koridebole ase, tai khan pora motob kori thakibole ase aro Nagaland laga potential ponjibo karni tai khan government logode para tak motob kori thakibole ase. Welcome speech deya Chief Minister Neiphiu Rio be next tui-din majode Commission khan state laga challenge deh buchi-pai kena State ke motob debo koikena biswas kori ase.
Add Comment