Supreme Court para 18,000 internally displaced manu khan ke voting facility dibole laga request ke mana nai

Imphal, April 15 : Supreme Court para Monday din te ahibole thaka Lok Sabha election nimitey Manipur te chuli thaka jati laga larayi nimitey desh bhitor te nijor laga ghor para dur hoikina thaka 18,000 manu ke voting facility dibole laga request ke swikar kuribole mana kuridisey. Manipur laga duita Lok Sabha seat nimitey polling tu April 19 aro 26 te duita phase te hobole asey. Chief Justice D Y Chandrachud aro justice J B Paridwala aro Manoj Misra para koisey etu court laga interference, khas kurikina etu belated stage te, etu para Manipur laga Lok Sabha laga general election conduct kora te badha anidibo. Etu bench para koisey, “Apni last minute te ahisey. Etu stage te, virtually ki kuribo paribo? Amikhan etu stage te interfere kuribo naparey.” Supreme Court tu Manipur resident Naulak Khamsuanthang laga request te hearing kuri thaksiey aro baki khan tu Mnaipur laga bahar te boha internally displaced manu khan nimitey taikhan boha rajya te special polling booth banaikina Lok Sabha election te taikhan ke vote dhalibole paribole dibo nimitey  bondobos kuribole ekta direction bisari thakisey. Petitioner khan nimitey appear huwa lawyear para koisey, “18,000 internally displaced manu asey. Taikhan tu Manipur laga election te vote kuribole mon asey.” May 3 te Manipur te jati laga larayi first ola homoi para 160 opor manu murisey aro ekso opor manu jokhom hoisey. Etu larayi jhagra tu komti hoi asey hoilebi bisi manu khan tu etya bi taikhan laga ghor para dur relief camp khan te buhi asey.