May 26, 2021. Tuesday din Tripura Government para Agartala Municipal Corporation (AMC) areas aro 19 other civic bodies te COVID-19 curfew toh aro June 5 daik dak othaishe koishe. Tripura Law minister Ratanlal Nath para koishe ke, State Government para COVID curfew toh urban local bodies (ULB), AMC aro state alag-alag jaga te virus besi pheli jai thaka nemite curfew toh aro othaboli fesla loishe. “etu curfew toh ULBs jaga te May 26 darik 5AM para soruh hobo aro state laga dosura jaga te May 27 darik para June 5 darik dak thakibo,” koikena Ratan Lal Nath para khobor toh junaishe. Tai aro koishe ke, etu fesla toh Tuesday din state cabinet meeting kora samai state COVID-19 laga halat beay wala jai thaka nemite fesa korishe. Hoilebi, curfew samai, essential services toh perabo aro dukan toh 6AM para 12 PM dak kulibo. Olop din akhe te be Tripura government para urban local bodies jaga te corona curfew toh 10 din nemite thakishe aro state laga alag-alag jaga te rathi curfew toh May 26 darik dak thakishe. “7 din corona curfew thaka samai state te bemari rate toh 21.37 percent thakishe,” Nath para aro janaishe. “ami khan para jani ase ke 10 din corona curfew thakina be bemari cases toh besi othishe, etu nemite bemari logot larai koribo nemite halat para aro hoshari koriboli janai ase. Government para bemari pheli thaka toh rokaboli kam kori ase, etu nemite cabinet para aro state te 24 gonda curfew jai thakiboli fesla korishe,” Nath para koishe. Tai para koishe ke, private offices sob bondh thakibo aro government offices nemite kaun khan emergency services te kam ase tai khan ke duty koriboli thibo. Tuesday din Tripura state te 773 notun cases thurishe, etu meliakena itya dak te 47,298 bemari cases ase. State te aro bemar para 3 jun manuh mora notun khobor paishe, etu melaiken a 470 manuh morikena ase.
Tripura Govt: June 5 dak aro curfew othaishe
