Agartala, December 11 : Tripura te Janajati Suraksha Mancha koikina ekta tribal rights body para December 25 te dhorom bodli kurikina Christian hoija tribal manu khan nimitey Scheduled Tribes (ST) status hataidibole laga demand kuribole nimitey ekta rally rakhibole laga erada janaisey. Etu tribal rights body, Janajati Suraksha Mancha ke CPM aro Congress para RSS laga support asey koikina accuse korey.
Etu Janajati Suraksha Mancha laga ekjun member, Milan Rani Jamatia para safa safi koidisey ki etu mamla tu kunba community nohoilebi dhorom laga khilaf te nohoi hoilebi taikhan laga hisap te Christian dhorom te bodli hoija manu khan duita duita subidha pa laga mamla ke thik kuribole laga maksat para kora asey.
Christian dhorom te bodli hoija tribal khan ke ST list para hataidibole laga demand tu suru te 1966-67 te uthaisiley. Aro 1970 te India laga Prime Minister ke Joint Parliamentary Committee recommendations logotey ekta demand list submit kurisey.
Etu Mancha laga ekjun senior member Binud Kumbang para ety dangor rally kuntu ke “Chalo Delhi” koi etu laga plan laga kotha kurikina koisey ki komsikom 5 lakh manu khan para etu rally te bhak lobole akha kurisey aro India laga President ke ekta memorandum submit kuribole bi akha kuri asey.
Etu mamla tu Tripura Tribal Areas Autonomous District Council laga asey kotey rajya laga 30% osor manu bohey.
Mancha laga convener Santi Bikash Chakma para behes kurisey ki rajya laga poila para chulikina ahi thaka culture aro tradition ke dhorom bodli kora tribal manu khan para olta polta kuridisey aro enaka koikina taikhan ke ST list para hataidibole laga demand ke justify kurisey.
Opposition party, CPM, Congress, People’s Congress aro TIPRA Motha para etu Mancha ke enaka sajish kora nimitey aro community majotey jhamila olaidibole kosis kora nimitey accuse kurisey.
Add Comment