Wokha deh Employment seminar loise

Wokha, 29 November: Thursday din Town Hall, Wokha jaga deh employment nemide seminar toh “Beti Bachao Beti Padhao” pethor deh lowah thakise. Etu seminar toh  District Administration Wokha logode Department of Employment, Skill Development & Entrepreneurship Government of Nagaland aro tai khan laga training partner Emporium Skill Training Institute, Kolkata aro Makeover Academy, Siliguri khan melikena employment opportunities pora lowah thakise. Resource manu toh Operations Manager-India & International, Anirban Mukherjee aro Business Development Manager, Suresh Sundas thakise. Students aro resource manu khan logode welcome kori thaga time deh             Deputy Commissioner, Wokha, Dr. Manazir Jeelani Samoon, IAS pora kowah toh, besi programme aro activities toh BBBP pethor deh loise. Etu programme laga main aim toh maike bacha khan laga life cycle deh dekthari pai thaga phal koribole laga ase, koikena janaise. Tai pora kowah toh, etu programme lowah toh youth maike aro school pora fail hoi kena olai ja maike khan logode training debole laga ase. Etu pora tai khan laga livelihood suru hobo karni. Etu programme laga pethor deh five pora six groups khan ke janipaise aro Wokha town laga alag-alag town deh train korise. Aro kunhab SHGs be etu par paper bag aro pickle making deh train korise. Kelay koile tai nejor economically independent thakibo karni. DC pora youth maike khan logode mon dangor hobole laga kotha janaideya toh, adolescence girls club laga importance aro issues deh hosiyar thakibole janaise. Aro club deh join nahoi kena thaga khan logode be join koribole janaise. Kelay koile etu deh besi laabh thaga pora aro tai khan laga personality phal kori kena phal leader bonaideya karni. Tai pora kowah toh, Sob block deh joldi adolescence girls club toh thakibole ase aro etu laga main aim toh maike khan logode etu laga issue khekabole laga ase. Kelay koile tai khan society laga leaders hobo karni. Programme time deh Operations manager- India & International, Anirban Mukherjee pora student’s khan logode alag-alag sectors- aviation, food catering, beautician, make-up artist, stylist aro hospitality nesana deh kaam pabole laga kotha kora thakise. Last deh registration toh alag-alag sectors deh trainings koribole monjaa student khan logode kora thakise.