Wrestler Vinesh Phogat aro Bajrang Punia Congress join kurisey

Chandigarh, September 06 : Mahoor wrestler Vinesh Phogat aro Bajrang Punia para Haryana assembly election hobole ageyte Friday din te Congress party join kurisey.Etu khobor tu, Vinesh Phogat para personal karon dikina Indian Railways para resign kurikina olop ghonta huwa picheyte ahisey. Etu duijun kara wrestler para Friday din te Congress president Mallikarjun Kharge aro dusra senior leader khan ke lok kurisey. September 4 te, taikhan para Congress leader Rahul Gandhi ke bi lok kurisiley. Bajrang Puniya tu Tokyo Games laga bronze medallist asey. Aro Vinesh Phogat tu Olympics final tak pungcha first maiki wrestler hoisey. Hoilebi, tai tu tailaga 50-kg category weighlifting nimitey tailaga weight jukha homoitey tailaga weight 100 gram bisi huwa nimitey tai disqualify hoijaisey. Etu picheyte tai sports para retire huwa laga announcement kurisey. Punia aro Phogat duijun bi juwa saal wrestler khan para poila laga BJP MP aro Wrestling Federation of India (WFI) chief Brij Bhusan Sharan Singh laga khilaf te sexual harassment laga mamla te protest kora te shamil thakisiley. Vinesh Phogat para, Indian Railways ke diya resignation letter te likhisiley ki railways te kaam kora tu tailaga jibon laga ekta yaadgar aro garv kora laga homoi thakisey. Aro taikey desh laga seva kuribole nimitey Railways para enaka moka diya nimitey tai  Indian Railway family ke hodai dhanyabad thakibo.Haryana laga 90 assembly seat nimitey voting tu October 5 te hobole asey. Aro vote laga ginti tu October 8 te hobole asey.Congress aro AAP tu Haryana Assembly election nimitey seat share kuribole baat-chit kuri asey. Duita party para bi seat nimitey bisi jordar bargain kuri asey.Congress te etu duijun high-profile(mashoor) manu ahija para Congress laga bargain kora laga power baraidibo koikina expect kuri asey. Khas kurikina, kilemaney kunba Haryana Congress leader khan AAP logotey team bana ke loikina doubt te thaka nimitey.