Sekrenyi mini Hornbill festival maaniya laga teen aro final din Tuophema village, Kohima te 27th February 2019 te thakise, tate Advisor for Rural Development, Dr. Neikiesalie Kire toh special guest karne thakise.
Neikesalie, kotha koriya samoy te, pora koise ki mini Hornbill festival toh state laga sob jaati laga festival othaidibo nimite maana laga ase. Opposition party pora bodnam korise ki budget toh besi bhag entertainment aro sports ke bhelai ase, tai pora koise ki Government toh jowan manu khan ke aalag-aalag field te jabole dibo mon ase kile koile sob manu toh government jobs napabo. “Moi khan besi lamba samoy nimite phabana koribo laage kile koile moi khan martial arts, women football, music etc te besi bhal ase. Moi khan khan nijor ke sobole paribo laage aro besi joledi har namanibo laage ” tai pora koise.
Tai pora foreigners khan ke etu deyohar te mochut thakiya nimite mon khusi aro dhanyabad diya janai dise. Foreigners khan ke namaskar korikena, tai pora etu foreigners khan ke December te asol Hornbill festival te bi aro mochut koribo karne maatise.
Kire pora etu bi koise ki bacha khan ke ami khan laga forefathers khan kenika thakise, etu janaidibo laage. “Moi bi etu biswas ase ki ami khan laga bacha khan ke besi chotu umar pora hi education nimite bahar te botha toh eman bhal fesla nahoi, kile koile tai khan ami khan laga culture aro tradition logote jaanikena thakibo nimite” tai pora koise.
Interlocutor, R.N. Ravi bi olop samoy karne etu deyohar te mochut thakise. Tai pora koise ki etu Sekrenyi deyohar te tai mochut koribole pariya toh tai nimite ekdum dangor dofa ase kile koile tai asol toh aalag kam nimite ahise.
Sekrenyi laga khana logote, etu deyohar te konoba indigenous games competition khan bi thakise, tate Tug of war, kedish mariya, top spinning, tel bamboo teothiya, folk song aro jun laga hala(war cry).
Advisor H. Haying, Advisor Toshi Wungtung, DC Kohima, Thejagwelie aro government officials khan bi etu program te mochut thakise aro besi public khan bi jamma hoise.
Sekrenyi Committee laga Convenor, Neitho-o Kense pora program te chairperson buhise; Chairman Tuophema VC, Pfuduolhou Kense pora welcome address korise; Tuophema Cultural Club pora ekta traditional dance korise aro Botsa Cultural Group aro Neichütuo & Party pora ekta-ekta traditional gaana korise.
Chief Minister, Neiphiu Rio toh Angami Sekrenyi mini Hornbill celebration 2019 laga chief host thakise. Etu deyohar laga theme toh “Purifying Confluence” thakise.
Add Comment