Wokha, 12 December: Beti Bachao Beti Padhao 2018 laga pethor deh District Administration Wokha pora Village Functionaries, NGOs aro Civil Organisations nemide ek-din seminar toh Wednesday din Town Hall, Wokha jaga deh loise. Seminar toh district laga GBs khan logode hosiyar (awareness) janaidebo karni besi phak lowah laga ase. GBs khan logode kotha kora time deh SDO (C) Wokha, Chonpenthung Ezung pora kowah toh, Prime Minister of India laga plan hesab deh, etu sal seminar toh October moina suru korise. Tai pora Wokha toh ekta junideya laga districts ase koise. Kelay koile Socio Economic Census 2011 laga deh saijaile, etu par girl sex ratio toh male sex ratio pora be komti powah karni. Tai pora main aim toh maike bacha laga important aro girl sex ration toh othabole laga ase koise.
Tai pora kowah toh, etu scheme ola bechide, public khan logode hosiyar janaidebo karni besi activities aro programmes khan loise. GBs khan thaki kena hesha lowah toh alag ekta ase. Kelay koile tai khan pora customs aro traditions deh thek pora mani.
Jama howah khan logode moda aro maike ke eki important debole kowah ke tai pora kowah toh, maike khan popra mana aro tai khan pora janaideya deh saijabo lagi. Kelay koile tai khan logode be talent asecommunity otha bole. Tai kushi pai kena ami khan laga community deh moda aro maike logode equal opportunity ase koise. Tai pora tai khan logode support kori thakibole aro society laga member olabole mondangor hobole kotha janaise.
Programme deh President Wokha GBs Association pora scheme najeta tak support kori thakibole aro motob kori thakibole kotha janaideya thakise. LDA, DC office Wokha, Renbeni Ovung pora lead kori kena sob participants pora maike bacha khan logode motob koribole aro support koribole janaideya thakise. Vote of thanks toh EAC, Wokha, Riku Khutso pora kora thakise.
Din phalli, Deputy Commissioner’s Conference Hall, Wokha jaga deh Strengthening & Reorientation of Customary Laws and Practices laga seminar lowah thakise. Etu seminar toh Beti Bachao Beti Padhao laga pethor ase. Programme laga recourse manu toh Project Director, DRDA, Thungdeno, Rtd.P.A to DC Wobemo Shitiri aro Rtd.P.A to DC Mhonrao thakise. Programme deh Deputy Commissioner, Wokha Dr.Manazir Jeelani Samoon, IAS aro ADC Wokha Mhathung Tsanglao pora be kotha kora thakise.
Add Comment