Macau, 2 August : India laga performance Friday din Macau Open Super 300 badminton tournament te mixed thakise. Top doubles pair Satwiksairaj Rankireddy aru Chirag Shetty harijaise, kintu Lakshya Sen aru Tharun Mannepalli semifinals te punchi jaise, men’s singles category te.
World No. 3 duo Satwik aru Chirag, juntu medal jitor ekta strong contender thakise, tai quarterfinals te harijaise unseeded Malaysian pair Choong Hon Jian aru Haikal Muhammad logot. Match te India laga pair 14-21, 17-21 te straight games te harise. Tai duita game te starting te he backfoot te chali jaise aru rhythm thik se pai naparile, juntu karone tournament para early exit hoijaise.
Dusra haat te, Lakshya Sen – second seed aru 2022 Commonwealth Games gold medallist – ekta dangor performance dikhai dise. Tai China laga Xuan Chen Zhu logot ekta tough match te 18-21, 21-14, 21-17 te jitise. Match ek ghonta besi time cholise, aru world No. 77 thaka Chen laga against te Lakshya dangor resilience dikhai dise. First game haarar piche te, tai aggressive net play aru sharp smashes use kori score equal kuri dise.
Deciding game te, Lakshya 7-1 lead loi lujai jaise, aru jitia Chen thora fightback dikhai dise bhi, tai composure loose nokori match jitise. Semifinal te Lakshya face koribo Indonesia laga fifth seed Alwi Farhan ke.
Lakshya logot semifinals te join korise 23 saal laga Tharun Mannepalli, juntu laga dream run abhi bhi cholise. Tai China laga Hu Zhe ke 21-12, 13-21, 21-18 te harai dise. World No. 47 thaka Tharun, 75 minutes laga intense battle te world No. 87 Hu ke harai dise, aru itu laga tai laga first-ever BWF Super 300 semifinal appearance ase.
Match te momentum bar bar change hoise. First game te Tharun dominate korise, second game te Hu strong comeback dise. Final game te Tharun 5-0 lead loi suru korise aru tense moment te bhi calm thakise, aru ekta smart push backhand corner te mari match finish korise.
Early round te bhi, Mannepalli top seed Lee Cheuk Yiu (Hong Kong) ke round of 16 te harai thakise.
Add Comment