California, 16 June : FIFA World Cup 2026 te, Cape Verde para football duniya laga powerhouse Spain logot ekdom outstanding performance dikhai kena 0-0 draw hasil korise.
Cape Verde laga 40 saal umor goalkeeper Vozinha para hero nisina performance dikhai dise, Spain para mara bisi dangerous shots save kori kena team ke match te rakhi dise.
Eki logot, Group G laga opener match te Iran aru New Zealand pora California laga Los Angeles Stadium te 2-2 draw khelise.
Match tu ekdom thrilling thakise. New Zealand para Elijah Just laga duita goals pora duibar lead loi thakise, kintu Iran para har namania spirit dikhai kena duibar equalise kori dise.
Anya ekta Group G match te Belgium aru Egypt para Seattle Stadium te 1-1 draw khelise.
Egypt para nijor first-ever World Cup win hasil koribo nisina thakise, kintu Belgium laga substitutes para taratari response diya karone match draw te sesh hoise. Egypt laga Emam Ashour para Player of the Match trophy jiti loise.
Group H te Saudi Arabia aru Uruguay pora US laga Miami Stadium te 1-1 draw khelise.
Saudi Arabia laga Abdulelah Al-Amri para 41th minute te rebound pora goal mari dise, ketiya Uruguay laga Maxi Araújo para 80th minute te equaliser mari kena match draw kori dise.
