KOHIMA, SEPTEMBER 29 : Chief Minister Nagaland, Neiphiu Rio pora Statewide Mass Social Work toh suru kura Programme, PHQ Junction, Kohima te 29th September 2018 te mana time te suru kuridese aro manaidese. Etu din te kotha kurikena tai Ease of Living Index hisabte saa aro Ministry of Housing aro Urban Affairs (MoHUA), Government of India pora ulaidiya khobor janaide thakise. Etubi ami kan state capital toh ekta thakibole nabara laga city (unlivable city) hisabte 111 cities thaka majutte 110 te ahe kena ase koi kena ula kotha. Etu pora CM Rio kotha kurikena Kohima te thaka manu kan ke ami kan state toh ekta 2nd wala thakibole nabara city ami kan desh laga majutte ula ke sorom nakhai koi kena janaide thakise koise. Etu karne tai Kohima manu kan sob ke khomai thaka pora uthebi aro ami kan state capital Kohima toh sundur banaidebole kuri kena ekta bhal naam banaidebi koi kena janaide thakise. Kele Kohima toh ami kan state laga ekta bhal capital (mirror) ase koi kena. Tai bi Kohima aro Dimapur majut laga rasta nemite toh tai kan sorkar pora bhal te saidebole kuri ase koi kena janaide thakise koise.
Etu din te Dr. Neikiesalie Nicky Kire, Advisor Rural Development porabi kotha kurise. Etu ke tai neju jaka toh sabha pora rakhibole kuribi koi kena janaide thakise koise. Etu din laga Programme toh Rajesh Soundaranjan IAS, Deputy Commissioner, Kohima pora ahkete luijai kena manaidese. Aro prathana toh Hoping Kips, Asst Pastor, Faith Harvest Church, Kohima pora kuridese koise.
Etu Mass Social Work mana ke Kohima te District Administration kobi Deputy Commissioner Rajesh Soundarajan IAS pora ahkete luijai kena manaise. Etubi tusera Administative Officers kan sob ADC Headquarters aro Sub-Division laga kan logot melekena. Aro etu ke Wards/Colonies kan sob Towns aro bosti kan Kohima District laga kan chama kurikena thakise koise.
Etu Mass Social Work bi tusera jaka kan te bi manaise. Etu kan toh nejete janai ase :
DIMAPUR : Dimapur District te City Tower Dimapur, Saturday pujut phal, 29th September 2018 te Mass Social Work manaise. Etu din te Nagaland PHED Minister Jacob Zhimomi pora kotha kurise. Etu ke tai ami kan laga neju jaka toh kinika sabha-sabhi rakhibole lagi etu kan janaide thakise koise. Tai bi ahkete luijabo koa toh khali khor aro kissim-kissim banabole kura ke koa nahui. Huilebi ami kan neju-neju jaka toh sabha-sabhi rakhibole kuribo lagi. Etu huilehi ami kan ahkete jabole kura hobo koi kena janaide thakise. Tai bi etu Swachh Bharat Mission, Central Sorkar, Prime Minister bitor laga leadership pora manabole kura din toh sob GBs, Village Councils, Local Community, leaders aro tusera kan etu kotha hune kena ahkete luijabole kuribi aro etu nesena chis toh tusera manu kan kebi janaidebole kuribi koi kena janaide thakise. Kele etu huilehi ami kan neju manu ke bhal kao banaidebo koi kena. Etu din te Deputy Speaker Nagaland, Zhaleo Rio, aro Advisor Power, Nagaland, Tovihoto Ayemi 2 jun pora bi bhal kotha janaide thakise koise. Aro etu din toh Deputy Commissioner Dimapur, Sushil Kumar Patel, IAS pora ahkete luijai kena manaidese. Aro tai Swachh Pledge kuridese koise. Etu bejete mass social work toh Dimapur District nemite Legislators kan Dimapur District laga kan pora suru kuridese. Etu ke MP Lok Sabha Tokheho Yeptho bi melekena thakise koise. Aro etu din nemite Government officials, village functionaries, party leaders, civil societies, NGOs, DMC, aro citizens kan Dimapur laga sob ahe kena thakise koise.
WOKHA : Ami kan desh laga sob jaka logot eke pora melekena hisabte manabole Wokha District Administration aro Wokha Town Council kanbi Mass Social Work koi kena sob colonies/wards kan Wokha Town lag ate manai kena thakise. Etubi Swachhta Hi Seva (Cleanliness is Service) laga naam pora. Aro etu din te Deputy Chief Minister & Minister for Home, Y Patton aro MLA Dr. Chumben Murry bi eke pora hisha kurikena thakise koise.
Tusera jaka te etu Mass Social Work mana toh Medziphema, Tseminyu, Pfutsero, Bhandari, Jalukie Town, Old Town Peren, Tening, Longkhim, Pughoboto, Mokokchung, Phek, Aghunato, Tuensang aro Kiphire jaka te manai kena thakise koise.
Add Comment