DIBRUGARH: State te economy othaboli nemite, Tuesday din Dibrugarh Airport te cargo services kulishe koishe. Airport Director Ramjee Awasthi para koishe ke, “Dibrugarh Airport te full-fledged cargo terminal toh alag-alag stages te itya bonai ase. Etu Airport te bapana thaka toh Air Cargo pera soruh hoikena manuh aro business ke motob thikena state te development aro growth othabo. Etu cargo terminal bonaboli toh Bureau of Civil Aviation Security para manishe aro service toh Cargo Terminal bona kotom nahowa dak passenger terminal building te soruh hoikena jai thakibo,” koikena Awasthi para khobor toh janaishe. “itya para shipments toh Dibrugarh Airport para kushi jaga te putaboli paribo aro saman toh jodi te thik samai pongchibo,” tai para aro janaishe. Awasthi para koishe ke, Air Cargo toh trade facilitator ase aro etu para Assam, Arunachal Pradesh aro dosura osor states laga economic growth te motob korikena important shipments neshina fresh fish, flowers, fruits aro dosura local saman toh desh pura te supply thiboli paribo. Air Cargo para desh laga economy othaikena employment opportunities be olabo koishe. Dibrugarh Airport te jarta(4) airlines perai thaka- Air India, Indigo, Vistara aro Flybig para service te motob koribo koishe. Sob melaikena etu airlines para saman toh ek din te 10 tons neshina bokibo koishe. Airport Director Awasthi par kowa kotha jarikena Dibrugarh Airport laga CASO, Limainba aro Dibrugarh te alag-alag trade & industry associations laga office bearers khan be etu occasion te samil thakishe.
Dibrugarh Airport te Cargo services kulishe
