DIBRUGARH: Saturday din Digboi-Duliajan rasta osor Dehing-Patkai National Park jaga te Oil India Limited (OIL) pipeline te jui thurishe koishe, etu nemite halat toh besi pui thakishe. Social media te video viral howa te jui toh Dehing-Patkai National Park osor OIL pipeline para olai thakishe koishe. Etu jaga laga local environmentalist, Devojit Moran koikena tai para OIL pipeline te jui olai thaka toh video loishe. Moran para koishe, “Dehing-Patkai National Park te OIL pipeline leak howa nemite besi thiktari te ase. Gas aro condensate te leak thaka nemite Dehing-Patkai National Park laga bio-diversity toh katara te ase’. Moran para aro koishe ke, “olop din akhe Dehing-Patkai toh national park bonaishe hoilebi Dehing-Patkai te illegal activities kora nemite kaun para hesab te nai. Social organization nahoile environmental organization para ahikena awaz ola nai. Hoilebi tai khan kali saa manuh neshina ase”. “OIL toh Dehing-Patkai National Park te drill kora soruh hoishe aro etu nemite national park laga osor jaga toh besi beya hoi ase.” “etu drill kora jaga osor te paani nodi horu ekta ase aro etu jaga te elephants ahikena paani kai thaki, itya drill kora nemite elephant toh naha hoishe,” koikena Moran para janaishe. Khobor para aro koishe ke, Oil chor kora manuh toh etu jaga te besi hoishe aro ketaiba toh tai khan para oil pipeline toh beya kori dey koishe. Dehing-Patkai National Park toh Jeypore aro Soraipung range pithor Dibrugarh aro Tinsukia district te ase aro etu jaga toh of 234.26 sq km ase koishe. Etu jaga toh paani-jungle ase, Assam Valley Tropical Wet Evergreen jungle toh elephants, hoolock gibbons, golden cat, clouded leopard aro dosura janwar laga ghor ase. Itya dak te 47 mammal species, 47 reptile species aro 310 butterfly species thaki ase koishe.
Dehing-Patkai National Park osor pipelint te jui olaishe
