GUWAHATI: Afghanistan toh Tabilan para kazap hoikena thaka samai, khobor para janaishe ke, Kerala te Afghan national ek jun ke thurishe. Etu manuh laga hath te Aadhaar card aro dosura documents toh Assam te bona laga thakishe. Kerala Police para Afghan national Abbas Khan alias Idgul, 22 umer ke July 21, 2021 din te thura ase koishe. Khobor hesab te etu manuh toh Cochin Shipyard Limited (CSL) te documents chor korikena kam kori thaka ase. Sunday din media para khobor korishe ke, Abbas Khan alias Idgul toh Afghanistan manuh ase aro tai para Assam address laga Aadhaar card jolai thakishe. Etu Afghan manuh toh India te Nepal hoikena ahishe aro tai para documents chor korikena Cochin Shipyard te kam bapoli nemite kora ase, koikena Kerala police para olop din akhe te khobor toh janaishe. Tai toh Assam te bohi thaka samai document chor korikena documents aro school certificates loikena Kochi te jaishe. Police para koishe ke, tai laga konuba ghor manuh khan be Cochin Shipyard te kam kori ase. Khobor para janaishe ke, tai toh Assam te 2019 saal ahishe, etu samai medical visa loikena thakishe, hoilebi etu visa toh kali 3 moina nemite thakishe aro etu visa expiry howa beche tai laga desh te wabas jowa nai koishe. Assam laga address loikena Aadhaar card bonaishe koishe. Kochi Police para etu mesa Aadhaar card toh Aghan laga hath para thurishe. Etu Afghan manuh para koishe ke, tai laga baba toh Aghan manuh ase aro tai laga ama toh Assam para ase koishe, etu nemite investigation jai thakishe.
Kerala te Afghan national logot Assam address Aadhaar card thurishe
