Agencies, 01 September: Afghanistan para US laga last sepai khan hatija bechite Taliban para tai khan jet toh hawa te bondukh hamla korikena manaishe. Etiya Taliban toh US sepai hatija bechite besi territory te control kori ase.
US sepai khan hata nemite President Joe Biden ke kushi napowa lok paise hoilebe tai para US laga sobse lamba war kothom koribole nemite tusara opai thaka nai koise. Tai para US toh wada korise koise Afghanistan para last 100-200 Americans bacha toh phal para korabole nemite. Khali Americans he nahoi kena tusara desh khan para thousands manu khan toh etiya be hatijabole nemite rokhi ase koise. Hatija deadlines kothom howa logote aro Afghanistan para Taliban te pura control te, tai khan laga future toh dekhana nathaka te ase koise. Afghanistan para last US sepai hatise aro United Nations toh Afghanistan te humanitarian disaster othi thaka te kenaka deal koribo fesla koribo lakibo koise.
Tuesday te US military aircraft Kabul para hata bechite India para Taliban logote first official contact bona thakise. Indian ambassador to Qatar Deepak Mittal toh Sher Mohammad Abbas Stanekzai, head of the Taliban political office ke Doha jaga te lok kora thakise. Ministry of External Affairs para ekta statement te meeting toh Embassy of India, Doha te loise koise aro etu meeting toh Taliban side para request nemite loise koise.
Ambassador Mittal para India para monn chinda kora Afghanistan laga mathi toh anti-Indian activities aro terrorism nemite eki-par najolabole opor te janaishe. Taliban representative para Ambassador ke etu issues toh thek para addressed koribole assure korise koise.
UN Security Council, under India’s Presidency te ekta gara resolution loise. Afghanistan laga territory toh kondu desh te hoilebe bhoi khelabole nahoile terrorists thakibole nemite najolabole demand korikena.
UNSC para be Afghans aro sob foreign nationals khan desh para phal para charija karni Taliban para wada kora te manibole bhabona janaishe.
Add Comment