Aizawl, July 10 : Duita Church bodies para request kora laga jawab dikina Mizoram te thaka alag alag denomination laga church khan para gondogol hoikina diktar te thaka rajya Manipur laga shanti tu wapas ahibole karney prathana kurisey.
Kunba church laga member khan para Saturday rati te prathana kurisey aro Mizoram Presbyterian ke milaikina kunba alag church khan para Sunday (July 09) te special prathana rakhisey.
Etu prathana laga request tu Mizoram Kohhran Hruaitute Committee (MKHC) para kurisey kuntu toh dangor church leader aro Northeast India Council of Churches (NEICC) laga hisa asey.
Poila te MKHC aro Mizoram Presbyterian Church para Manipur te chuli thaka jati laga larayi opor te serious chinta jataisiley. Aro kun manu khan ke etu larayi jhagra para affect hoisey taikhan laga sath baraisey.
Taikhan para badmash khan para church khan ke jolaidiya aro alag dhormic jaga khan ke bhangaidiya laga khilaf te bi kara para awas uthaisey.
Ekta official statement para koisey ki eya, Mizoram tu poisa laga kami lok pai asey kilemaney taikhan para Manipur para ahikina tatey buhi thaka manu khan ke modod dibole karney Centra laga haat para Rs 12,300 opor laga modod pabole baki asey.
Etu statement para koisey ki State finance department para etu Manipur para ahikina Mizoram te buhi thaka manu khan ke modod dibole nimitey Executive Committee ke Rs 5 crore maan dibole asey.
Etu statement te enaka bi koisey ki sarkar para minister, legislator, corporator, Central aro state laga sarkari kaam kora manu, PSUs aro commercial bank khan para bi poisa uthabole faisla kurisey.
State home department laga hisap te etya tak tu Mizoram laga 11 district te Manipur laga 12,344 manu khan buhi asey.
Etu department para koisey ki sobsey bisi manu tu Northern Mizoram laga Kolasib district te asey kotey Manipur laga 4383 manu buhi asey aro etu pichetey asey Manipur border te thaka Aizawl district otey 4167 manu buhi asey aro Saitual district te 2940 manu buhi asey.
