Gangtok, July 10 : July 10 te Sikkim laga Geyzing jaga te Indian Reserve Battalion (IRB) laga ekjun jawan laga murikina thaka body paisey. Etu murikina thaka jawan laga naam tu Passang Tshering Bhutia thakisey aro tai laga umar tu 29 years thakisey. Tai tu Sikkim laga Upper Kyongsa, Geyzing te thaka tailaga ghor para July 8 para haraikina thakisey. Tai laga dead body tu dui din pichetey Geyzing te thaka St. Mary’s School laga osor te thaka ekta feeder te paisey.
Passang Tshering Bhutia para 3din laga leave loisiley aro tai haraija laga ekey din te taikey ghor wapas ahibole akha kuri thakisey. Hoilebi tai tu tailaga ghor te wapas naha hoisey kuntu para tailaga parivar ke dangor chinta te dhali disey . Aro tai laga haal chal janiboley rukhibole naparikina thakisey.
Etu lapata hoikina thaka IRB jawan ke akhri bar ekta red colour laga scooty cholai thaka dikhisey kuntu laga registration number tu SK04-0708 thakisey.
Police para etu mamla te investigation suru kuri disey taki Passang Tshering Bhutia tu ki halat te murisey etu janibole paribo. Geyzing Police Station para ekta General Missing Diary entry bi file kurisey.
