Guwahati, July 10 : Northeast laga Assam rajya te thaka Central Reserve Police Force (CRPF) tu Monday(July 10) te suicide kurikina murisey.
Etu murija CRPF laga naam tu Pranjal Nath thakisey.
Nath tu Assam laga Sonitpur district te thaka manu asey aro tailaga posting tu Jharkhand te thakisey.
Pranjal Nath para thaka Jharkhand laga Chianki jaga te CRPF laga 112th battalion laga headquarter te duty te thaka homoitey nijor laga jaan loisey.
Reports hisap te Nath para nijor ke tailaga service rifle para guli marisey.
Nath laga suicide kurikina mora laga pichetey ki karon asey etu tu janibole baki asey.
Hoilebi authorities khan para etu ghotna te ekta investigation suru kuridisey.
Pranjal Nath kun laga umar tu 31 years asey tai tu Assam te dui moina laga chutti bita pichetey July 8 te duty wapas join kurisiley.
Tai laga dead body ke Jharkhand laga Medinirai medical college te post-mortem kuribole pathai disey.
Pranjal Nath tu Budha Pahar koikina ekta jaga te Maoist(atangwadi group) khan laga khilaf te operation kora laga hisa bi thakisey . Etu jaga ke olop din agey te security forces khan para etu Maoists(atangwadi group) para azad kuridisey.
