Shillong, January 14 : Meghalaya laga Shillong parliamentarian seat nimitey National People’s Party (NPP) candidate Ampareen Lyngdoh para koisey ki judi tai elect hoisey koiley tai tu Parliament bhitor te Hindi te kotha kuribole tayar asey.
Tai para koisey ki tai tu Parliament te sob mamla uthabole nimitey Hindi te kotha kuribole tayar asey hoilebi Meghalaya laga manu khan opor te Hindi impose kora laga khilaf te asey.
Parliament te behes kora homoitey Hindi chola tu acknowledge kurikina Lyngdoh para koisey, “Ami para Meghalaya laga manu khan laga awas tu bhal para hunibole dibole nimitey Hindi te kotha kuribole tayar asey.”
Hoilebi, tai tu tailaga jaga khan te joborjosti Hindi cholabole diya laga ekdam khilaf te asey koisey.
Tai para koisey ki Delhi para Meghalaya te aha leader khan tu amikhan laga manu para bujibole para laga bhasa cholabo lagey. Aro taikhan para enaka nukurisey koiley etu tu swikar kuribole napara laga asey, kilemaney bisi bhak manu khan tu bujibole napara hoijai.
Lyngdoh para agey barikina dhormic atyachar kora laga khilaf te khara kora tu wapas dohraikina koisey “Sob dhorom bi respect deserve korey. Amikhan tu ekta secular(sob dhorom ke mana) desh asey aro dhorom ke bachaikina rakha tu sobsey bisi jaruri asey.”
Rajya ke affect kora jaruri mamla khan te focus kurikina, Lyngdoh para Constitution laga Sixth Schedule ke majboot kuribole laga jarurat janaisey.
Etu opor te, Lyngdoh para Indian Constitution laga Eight Schedule bhitor te Khasi bhasa ke recognize kuribole dibole nimitey awas uthabole bi kosom khaisey.
