Shillong, January 15 : Meghalaya laga Chief Minister Conrad Sangma para Tura te President Droupadi Murmu ahibole thaka laga opor te koisey ki President para rajya te ahibole thaka tu rajya laga manu khan nimitey bisi dangor kotha asey kilemaney youth khan nimitey etu tu ekta dangor motivation(hosla baraidiya laga) aro ekta dangor message diya nisna hobo.
Conrad Sangma para media ke kotha kurikina koisey, “Amikhan nimitey bisi rasta para etu tu ekta etihasik moment asey. Sobsey poila tu, India laga izzadar President Tura te first time ahi asey aro yatey ek rati buhibole asey. Etu tu bisi dangor kotha asey, khas kurikina Tura aro etu jaga laga manu khan nimitey.
Second te, hoi, etu visit kora tu Meghalaya games chuli thaka homoitey hobole asey. Aro etu nimitey, rajya laga youth khan nimitey etu tu ekta dangor hosla baraidiya laga aro ekta dangor message asey. Meghalaya Games tu Meghalaya te hodai saal huwa laga event asey aro 50 years te first time etu event tu Tura te hobole hoi asey. Etu nimitey, etu jaga karney bisi jaruri asey.”
President Murmu para Meghalaya ke visit kuribole thaka tu yaad kuribole laga asey kilemaney etu tu Meghalaya games inaugurate kora homoitey huwa laga asey. Meghalaya games tu enaka event asey kuntu te, 22 games te 3,000 competitors khan laga athletic kabiliyat dikhai aro etu te tatey laga local jati Khasi, Jaintia aro Garo community laga traditional(purana jamana te khila) sports khan shamil asey.
Meghalaya Games te, President laga mojudgi para youth aro etu event te bhak luwa manu khan laga hosla barabole asey koikina akha kuri asey. Aro alag alag jati khan ke ek sath ana aro personal development tea ports laga ahemiyat dikhai asey. Etu games tu January 15 para 20 tak chulibole asey. Aro etu event nimitey rajya laga sarkar para bisi support paisey. Purapuri Rs 23 crore poisa paisey kuntu para rajya laga sporting calendar te etu event kiman jaruri asey etu dikhaisey.
Meghalya visit kora homoitey, President Murmu tu alag alag developmental kaam khan te ahmil hobole asey. Tai tu Tura laga Baljek Airport te self-help group laga member khan ke kotha kuribole asey aro Tura laga nutun Integrated Administration Complex nimitey virtually foundation stone dhalibole asey. Etu opor te, tai para upgrade huwa rasta khan inaugurate kuribole asey aro Shillong Peak Ropeway aro bisi alag alag busti khan te tourist khan thakibole jaga nimitey foundation stone dhalibole asey.
President Murmu para January 16 te Shillong laga Raj Bhavan te Meghalaya sarkar para host kuribole thaka ekta civic reception attend kuribole asey.
