Shillong, January 16 : India laga President Droupadi Murmu para Self Help Group (SHG) laga member khan, entrepreneurs aro farmer khan logotey kotha kurisey kun khan tu Meghalaya laga alag alag jaga para ahikina West Garo Hills laga Jengjal te thaka Baljek jag ate jama hoisey. Etu tu Meghalaya laga Governor Phagu Chauhan, Chief Minister Conrad K. Sangma, Power Minister A.T. Mondal aro Education Minister Rakkam Sangma laga mojudgi te hoisey.
Etu India laga President para online para Tura laga nutun Integrated Administrative Complex nimitey foundation khara kurisey.
Bhasan diya homoitey, President Murmu para rajya laga sarkar para rajya te maiki khan para chola Self Help Group (SHG) khan ke promote kuribole nimitey kadam utha laga tariff kurisey. Tai para koisey, enaka homoi thakisey jitya meeting khan te maiki khan ke konorokom dikhey, hoilebi aji India tu agey bari asey aro maiki khan tu India agey bara laga kahani laga hisa asey.
Etu President para koisey ki maiki khan ke samaj, economic, rajneetik aro dhormic area te empower kora tu desh nimitey 2047 tak te ekta developed desh hobole laga vision realize kuribole jaruri asey.
Tai para etu koisey ki India laga maiki khan tu ekta naam banai asey aro sob field te dusra maiki khan nimitey rasta khulidi asey . Etu tu defence, science aro technology, sports, education, entrepreneurship, agriculture aro ki ki alag field khan te hoilebi rasta khulidi asey. Taikhan ke khali olop kotha khan koidibole aro hosla baraidiya laga chutu mutu action aro taikhan laga pithi te pat kora laga jarurat asey.
Etu President para koisey ki maiki khan para development ana laga idea tu titya hey lagu kuribo paribo jitya maiki khan para taikhan laga choice banabole laga azadi pabo. Poisa laga independence pa picheyte etu tu olop haad tak hosa hoi asey. Tai para koisey, “Poisa nimitey nijor opor te nirbhar thaka para maiki khan te dangor self-confidence aney.”
President para koisey ki India laga sarkar para maiki khan ke desh laga socio-economic development te josh para contribute kuribole dibole nimitey ki parey sob kuri asey.
Tai para koisey, “Kaam kora manu majotey maiki khan participate kora te improvement anibole nimitey bisi alag alag kadam uthai asey. Sarkar para maiki khan laga samajik aro economic development nimitey ekla alag alag kadam utha laga nohoikina taikhan ke rajneeti te bi shamil hobole dibole nimitey dangor kadam uthaisey. Hoilebi, maiki khan ke empower kora laga direction te jabole nimitey etya bi bisi lamba rasta bachikina asey.”
Tai para manu khan ke taikhan laga aas paas te thaka maiki khan laga kimat aro khubi tu pehchanibole aro taikhan ke support dibole request kurisey.
President Droupadi para Self Help Group laga member khan ke agey bari thakibole request kurisey aro dusra maiki khan laga haath dhurikina taikhan ke agey loijabole nimitey request kurisey. Tai para koisey ki etu tu maiki khan ekla laga journey nohoi hoilebi amikhan laga desh te thaka sob maiki khan laga asey kun khan tu taikhan laga ghor laga charta wall laga bahar te thaka opportunity khan bisarikina olabole baki asey. Taikhan tu tikhan laga jaga aro desh te thaka alag maiki khan nimitey ekta inspiration hobo lagey.
Bhasan diya picheyte, President Droupadi para bhir te thaka maiki khan ke lok kuribole ahisey aro taikhan logotey adha ghonta maan kotha kurisey aro Self Help Group (SHG) khan para dhala stall ke visit kurisey kotey rajya laga alag alag bustu khan display kurikina thakisey.
