Guwahati, January 21 : Assam laga BJP sarkar para pressure aha nimitey rajya laga Batadrava Than management para Senior Congress neta Rahul Gandhi ke January 22 te tatey 3pm laga ageyte ahibole mana kuridisey.
Rahul Gandhi tu Batadrava Than te January 22 laga phujur 8 am aro 9 am fale jabole thakisey.
Rahul Gandhi etu jag ate jabole thaka laga timing aro tarik tu Prime Minister Narendra Modi para Ayodhya te Ram Mandir inaugurate kuribole thaka logotey takrai thakisey.
Batadrava laga MLA Sibamoni Borah ke patha ekta letter te, Batadrava Than management para koisey ki January 22 te “Rahul Gandhi tu 3pm ageyte Batadrava Than bhitor te gusibole allowed nohobo.
Batadrava Than management para enaka kora laga karon tu Ayodhya te Ram Mandir inaugurate kora laga occasion te etu jaga aro etu jaga laga aas paas te bisi programme hobole asey koikina koisey.
Assam Congress MP Pradyot Bordoloi para Batadrava Than management laga etu kadam laga khilaf te kara para object kurisey.
Tai para enaka koisey, “Batadrowa Than Management Committee para Assam laga BJP sarkar laga pressure te ahikina Rahul Gandhi ke January 22 te samaj te bodli anidiya dangor manu Srimanta Sankardev laga jonom huwa te ahibole para rokhaidisey kun para ekta sob manu ke shamil kora aro ekey somman treat kora laga bhabna rakha Assamese samaj anidisey.
Jnauary 20 te, Senior Congress neta Jairam Ramesh para announce kurisiley ki jitya pura BJP party aro Prime Minister Narendra Modi para Ayodhya te Ram mandir laga inauguration attend kuribo etu homoitey Congress laga bisibhak senior leader aro Rahul Gandhi para Assam laga Nagaon district laga Bordowa ‘Batadrava’ Than ke visit kuribo.
Jairam Ramesh para enaka koisiley, “ January 22 te, Rahul Gandhi tu Nagaon laga Bordowa Xatra te thakibo aro Sri Sri Shankardev ji ke soman dibo.”
Bordowa tu Srimanta Sankadev laga jonm huwa jaga asey.
Srimanta Sankdeva tu 15th-16th century laga bisi area te goon(talent) thaka Assamese manu thakisey. Tai tu ekta pavitra-pora likha manu, poem likha manu, natak likha manu, dancer, actor, musician, artist, samajik-dhormic bodli anidiya aro Assam laga cultural aro dhormic etihas te ekta bisi important manu thakisey.
