Shillong, January 21 : Shillong, Meghalaya laga North Eastern Hill University (NEHU) laga student khan para Ram Mandir Inauguration kuribole thaka din te half-holiday(adha din chutti) declare kora te kara para objection janaisey.
NEHU student khan para Ram Mandir inaugurate kora din te adha din chutti diya laga notice isse kora tu joldi withdraw(hataidibole) demand kurisey.
North Eastern Hill University Students Union (NEHUSU) para etu point out kurisey ki India laga Constitution(desh laga nyom aro kanoon) para safa safi India tu ekta “Secular Republic”(matlab ekta particular dhorom logotey lena dena nathaka laga) asey koikina declare kurisey.
Aro koisey ki dhormic event tu snahi sarkar para taikhan laga haath te loi nahi taikhan laga haath te lobo lagey. India laga sarkar para nijor ke eku ekta particular dhorom ke promote kora te shamil nukuribo lagey.
NEHUSU laga general secretary Banpynbiang Riang para koisey, “Etu occasion nimitey chutti declare kora tu NEHU nisna public educational institution aro Constitution(India laga nyom aro kanoon) laga secular bhabna ke direct hamla kora laga asey. Manu khan para etu mandir bana laga naam te bisi saal para nafrat feila laga campaign, dhorom, jati majotey larayi jhagra ola aro khoon kharaba laga rajneeti chuli thaka tu bi napaoribo lagey.”
Etu students union para koisey ki taikhan tu NEHU university campus ke communalize(dusra laga dhorom nohoilebi nyom ke dusra laga opor te imply kora) kora laga virodh kuribole committed asey. Aro NEHU para comit kurikina thaka unconstitutional(desh laga nyom kanoon hisap te nathaka) aro communal harkat khan swikar nukuribo.
ETu adha din chutti diya laga notification ke joldi hataidibole laga demand kurikina, NEHUSU para university laga vice-chancellor laga office ke nijor ke central government laga communal agenda(ekta dhorom te focus kora laga plan) te comprador(business te investment, kina-bika khan kora te agent nisna kaam kora manu) nisna beybohar kora para rokhabole appeal kurisey.
Etu union para koisey ki judi etu notice tu hataidiyanai koiley aro Monday (22.01.24) te university laga office khan bon thaka paisey koiley, etu student community para ekta university lock-down lagu kuribo lagibo aro university laga secular ethos(prakriti) laga khilaf te ja manu khan laga against te kara action nuluwa tak ekta office ke bi chulibole nidibo.
Aro enaka bi koisey ki etu students union tu kuntu dhorom nohoilebi dhormic bhabna laga nahi saath aro nahi khilaf te asey, hoilebi taikhan para university laga administration para university te ekta particular dhorom impose kora tu bardash nukuribo.
Department of Personnel and Training, Ministry of Personnel,Public Grievances and Pensions para notice issue kora hisap te 22 January laga 2:30pm tak, adha din nimitey sob Central Government office, Central Institution(school, college khan) aro Central Industrial Establishment khan bon thakibo lagey.
