Itanagar, January 23 : Itanagar laga Arunachal Pradesh Youth Congress (APYC) laga member khan para Monday din te Itanagar te protest rakhikina Assam te Bharat Jodo Nyay Yatra chuli thaka homoitey Congress MP Rahul Gandhi laga convoy te hamla huwa tu condemn kurisey.
Congress protestor khan para Assam Chief Minister Himanta Biswa Sarma laga putla ke jolaidisey.
APYC President Tarh Johny para etu ghotna tu ekta “chinta kuridiya laga mamla” asey koisey aro BJP aro RSS worker khan laga etu harkat tu ekdam khusi napa laga asey koikina janaisey.
Tai para koisey, “Amikhan para etu ghotna ke criticise kuri asey aro Chief Minister Himanta Biswa Sarma para chola Assam sarkar laga hukum diya beybohar aro authorities khan ke criticise kuri asey.”
Johny para agey barikina Rahul Gandhi ke Batadrava Than te, Assam laga poila jamana laga ekta dangor manu Sri Sankardev laga jonom huwa jaga te jabole permission nidiya ke bi criticize kurisey.
APYC para koisey, “Taikhan para AICC general secretary Jairam Ramesh ke bi hamla kuribole kosis kurisey. BJP laga manu khan para tailaga gari para Bharat Jodo Nyay Yatra sticker khan hataidisey, pani felaisey aro Bharat Jodo Nyay Yatra laga nara lagaisey.”
Aro koisey ki Assam Pradesh Congress Committee president Bhupen Borah aro Congress worker laga team khan ke biya para hamla kurikina Borah ke biya para jokhom kuridisey. Etu hamla kora laga maksat tu Congress team ke Sarma laga corruption(poisa kha tu) expose kuribole para rokhabo nimitey bhoi khilaikina chup korabole nimitey thakisey.
