Imphal, January 23: Manipur laga pahari elaka te thaka Ukhrul district te 45 acre maan gairkanooni poppy(drugs khan banabole chola ghas) kheti khan barbad kuridisey aro poppy cultivation te chola bustu khan logotey kheti laga nigrani kuribole nimitey bana chutu mutu 5ta ghor bi jolaidisey.
Tuesday din te ekta official statement para koisey ki khufiya jankari pa hisap te, etu poppy ghas khan tu katibole nimitey tayar hoisiley. Rajya laga forces(police, army khan) laga ekta team para local volunteer khan logotey milikina east fale para Myanmar border fale thaka Manipur laga Ukhrul district te poppy laga kheti jolaidibole laga kaam kurisey.
Ukhrul district te bisibhak Manipur laga Tangkhul Naga khan bohey.
Poppy kheti kora laga khilaf te etu kaam tu Manipur laga tinta pahari area- Mullam, Shongphei aro Sinakeithei LM Block te juwa 3-din para chuli asey. Etu 3ta jaja bi Ukhrul district bhitor te asey.
Ukhrul district laga Additional Superintendent of Police, Ringthing Hongchui kun para tailaga supervision under te etu kaam khan hoisey, tai para koisey ki etu illegal saman laga kheti kora laga against te kaam kora tu harvest season khotom hobole agey te continue kuribo.
Etu kora laga maksat tu Ukhrul laga pahari elaka te poppy kheti kora tu khotom kuridibole laga thakisey.
Etu laga maksat tu Ukhrul ke poppy aro sob illegal drugs para mukt kuridibole laga asey, koikina Hongchui para koisey.
