Shillong, March 12 : Meghalaya Chief Minister Conrad Sangma para Tuesday(March 12) te declare kurisey ki March 09 te Them Iew Mawlong te Shillong ke hilaidiya IED bomb blast nimitey zimidar thaka manu khan lag akhilaf te kara kadam uthabo.
Meghalaya CM Conrad Sangma para koisey, “Bisi manu khan arrest hoisey aro taikhan laga khilaf te action chuli asey. Amikhan para enaka ghing lagiya laga kaam kora manu khan ke sajai dilabo.”
Tai para law enforcement para joldi action luwa tu highlight kurikina etu laga karon tu ekta majboot police intelligence network aro crime-solve kora technology laga istamal kora nimitey asey koisey.
Sangma para koisey, “Police investigation tu chuli asey aro bisi manu arrest hoikina asey. Police official para amikey rati diri tak bi etu mamla laga update di thakey aro ami para etu situation te osor para nazar rakhi asey.”
Jitya CM Conrad ke judi HNLC (Hynniewtrep National Liberation Council) etu blast te shamil asey koiley shanti laga baat-chit tu continue kuribo na nai koikina huda homoitey, etu Meghalaya Chief Minister para eku natija te pungchibole ageyte bhal para investigation kuribole lagey koikina jawab disey.
Sangma para koisey, “Amikhan para eku official statement dibole ageyte pakka saboot jama kuribo lagey. Amikhan para huda hudi kora rao intelligence laga through para olop surag paikina asey hoilebi amikhan logotey pura details nathaka tak tu eku kobole naparey.”
Tai para koisey, “Police operation chuli asey aro enaka galat kaam te shamil thaka manu aro group khan ke dhuribole nimitey amikhan mehnat kuri asey.”
Sunday(March 10) rati te, duijun suspect ke Meghalaya Police para etu mamla laga connection te arrest kurisiley. Etu duijun suspect majotey ekjun HNYF(Hynniewtrep National Youth Front) leader shamil thakisey. Etu duijun arrest huwa manu majotey ekjun tu HYNF disciplinary secretary Tarzan Lymba aro ekjun tu Ebakordor Nongpluh koikina thakisey. Taikhan duijun ke 10 din nimitey police custody te remand kurikina asey.
Monday(March 11) rati te, Meghalaya police para etu case laga connection te, aro 4jun suspect ke arrest kurisiley.
Etu manu khan ke Meghalaya laga Ri Bhoi district para dhurisey.
Reports hisap te, Meghalaya laga Ri Bhoi district laga police para East Khasi Hills police logotey milikina ekta joint operation kurisey kuntu te Umsning aro Nongpoh para 4jun manu arrest hoisey.
Etu operation kora homoitey, etu manu khan laga haath para bisi explosive(phutiya bustu) seize kurisey.
Sources para jankari pa hisap te, etu arrest huwa manu khan tu Ri Bhoi laga Nongpoh te aro ekta bomb blast kuribole plan kuri thakisey.
Meghalaya laga authorities khan para etu bomb blast logotey jurikina thaka baki suspect khan ke bisarikina dhuribole nimitey kosis baraidisey.
