Agartala, March 20 : Tripura chief electoral officer (CEO) Puneet Agarwal para inform kurisey ki rajya te hobole thaka Lok Sabha election tu smooth para hobole dibole nimitey rajya te komsikom 7000 central forces ke duty te dhalisey, aro bi joldi pungchibole asey.
Media ke jankari dikina, Tripura Chief Electoral Officer (CEO) Puneet Agarwal para koisey ki rajya laga sob polling booth te CCTV camera dhalibole asey aro voting process ke osor para najar rakhibole nimitey ekta centralized control room para live streaming kuribo.
Tai para etu biswas dilaisey ki free, fair, transparent aro peaceful election kuribole laga principle ke dhurikina rakhibole nimitey lamba measure implement kuribo aro koisey ki electronic voting machine (EVM) check kora laga forst round tu already complete hoikina asey.
Ageybarikina, Agarwal para koisey ki Tripura laga sob polling booth te kiman khatra asey etu mapping kora tu finalize hoisey aro election process ke bachaikina rakhibole nimitey dhyan para planning kora laga kotha koisey.
Tripura West constituency nimitey Lok Sabha polls tu April 19 karney schedule kurisey kuntu tu Ramnagar assembly seat laga by-election logotey coincide kuri asey.
Etu picheyte, Tripura East constituency laga election tu April 26 te hobo.
Agarwal laga hisap te, pura puri 13.61 lakh voter tu Tripura West Lok Sabha seat laga election te participate kuribole eligible asey. Aro 45,669 voter para Ramnagar bypoll te taikhan laga democratic rights cholabole asey.
Etu opor te, East Tripura seat te 13.95 lakh eligible voter dikhibole asey.
Agarwal para Tripura laga Santirbazar laga Kalagang area te extra polling booth banabole bi announce kurisiley.Kotey Bru refugee khan January te resettle hoisiley.
Etya Tripura te 3349 polling station chuli asey.
