Agartala: Indo-Bangla laga border kan deh Sonamura laga subdivision,Tripura, deh ekya manu ke guli marina morai dishey aro ekta toh guli lagina jokom huishey. Etu BSF(Border Security Force) laga manu kan aro smugglers thaka suspect kan laga majodeh clash hwa karney ase. Etu ghatna toh Wednesday rati deh huishey koi ase.
Mura manu laga naam jana toh ‘Saheed Miah’ ase koi ase aro jokom khaija manu laga naam toh Kabil Miah ase koi ase aro tai toh etya Agartala laga hospital deh elaj(treatment) loi ase koishey enaga ekta senior officer ba koishey.
Border laga area Tripura deh smuggling hoi thakishey koina khobor paishey BSF laga patrolling party kan ba tadey border phaley duty kura time deh. Taikan ba smuggling kura manu kan ke dhuriboley le try kura time deh hatapai shuru hoishey aro BSF laga troop kan ba koishey ke taikan opai nathakina guli mariboley shuru hoishey. Etu toh taikan self defence karney firing kan shuru kuridishey koishey.
Etu ghatna laga result deh duita smuggler suspect kan biya ba jokom kaishey aro taijun ke local hospital deh rush kurishey.
Hoilibi, Saheed Miah kuina smuggler suspect toh taila jokom bishi serious thaka karney tai toh hospital deh shift huina thik murishey. Kabi Miah ke toh Agartala loijaishey koina koishey.
Etu case deh olop bishi khota koina Senior police laga official ekta ba koishey ki etu ghatna toh 9 arp 9:30pm laga majo deh hoishey, NC Nagar BOP laga bitor deh.
Report hisab deh BSF laga jawan ekta bhi smuggler kan logot hatapai deh jokom kaishey. Tai toh self-defence deh guli mariboley hoi jaishey jokom kha karney.
Hoilibi tadey laga thaka local manu kan ba report dishey BSF jawan laga khota katina ki guli mariboley eku enaga zaroori thakanai koishey.
Ekta BSF laga source ba EastMojo ke khobor dishey ki BSF laga troop kan ba khali khali guli hawa deh marishey koishey smuggler laka group ke alag alag kuriboley. Taikan ba etu ghatna karney Pump Action Gun bi cholawoley olaishey koishey, hoilibi smuggler laga group kan ba bhagiwo laga eku sign kan dikhanai koishey. Ulta taikan ba pator kan philawoley shuru kurishey koishey.
Opai natakina BSF jawan ba taikan laga opor deh guli maribo ley shuru kuridishey, enaga koishey BSF official ekta ba EastMojo ke.
