Pradeep Rawat para koisey ‘Ghajini’ te Aamir Khan laga role nimitey Salman Khan first choice thakisey

New Delhi, May 20 : Ghajini tu Amir Khan laga career te sobsey bhal film asey. Etu tu 2005 te ekey naam te release huwa Tamil film laga Hindi remake asey kuntu 2008 te release hoisey. Hoilebi etu film te Amir Khan laga role nimitey first choice tu Salman Khan thakisey. Pradeep Rawat, kun etu film laga Hindi aro Tamil version duita te bi gunda laga role kurisiley tai para share kurisey ki kinaka tai para etu film laga main role nimitey “short-temper thaka” Salman Khan laga  bodli Aamir Khan ke lobole suggest kurisey. Ekta interview te Pradeep para koisey, “AR Murugadoss (etu film laga director) para koithakey ‘ami etu film(Ghajini) Hindi te banabole mon asey’. Ami para mon te bhabna kurisey ki Salman Khan tu ekta joldi gusa uthija manu asey aro Murugadoss tu nahi English nahi Hindi bhasa te kotha kuribo parey. Utu homoitey tailogotey ekta personality bi thakanai.” Agey barikina Pradeep Rawat para koisey ki tai para bhabna kurisey etu role nimitey Aamir Khan thik choice hobo kilemaney tai tu joldi gusa na-utha aro shanti manu asey. Aro tai sob manu logotey izzat para beybohar korey. Tai para juwa 25 years te, Aamir Khan ke kun laga opor te hala kora dikhanai. Tai para kunke bi disrespect koranai aro biya kotha cholanai. Etu nimitey tai para bhabna kurisey ki bebohar hisap te Salman Khan ke handle kuribole naparibo nohoile tatey misamisi jhamila olaijabo.” Ghajini te Aamir Khan tu Sanjay Singhania laga role korey kun olop homoi nimitey yaadash jaija laga problem paikina thakey. Aro tailaga morom kora maiki Kalpana(asli naam Asin) nimitey badla lobole kosis kuri thakisey.