June 01, 2024 : Decoupage opor tey workshop loishey, kuntu toh hoiley ekta skill development training program thakishey, maiki manu aru chukri khan nimitey, itu organize kurishey, aru itu toh hoiley Phek laga Town Council Hall tey para loishey, 31st March, 2024 tey. Itu program toh hoiley mili ken aitu District Administration & District Hub for Empowerment of Women, Mission, Phek District para organize kurishey, Beti Bacho Beti Padhao (BBBP) under tey.
Phek laga Deputy Commissioner – Tsulise Sangtam para itu occasion ke grace kurishey, tatey special guest buhi kena, tai para tai laga confidence express kurishey, itu workshop program laga objective opor tey, aru itu trainee khan ke encourage kurishey, tai khan laga sincere attention aru dedication diboley tai khan laga training program tey aru itu skill khan shikha para itu toh bhal para chulaboley koishey, itu resource person khan para shikha toh. Itu same homoi tey, itu DC para itu trainee khan ke itu bhi advise kurishey, tai khan laga future career nimitey target kuriboley, economically independent hoboley karney.
Resource person Diethoseno Whiso para Decoupage opor tey share kurishey, itu laga usage aru applicability opor tey. Tai para itu trainee khan ke ekta hobby banaboley encourage bhi kurishey, kaam kuribo nimitey. Itu trainee khan aru participant khan straw basket khan, wooden spoon khan aru Tea coaster khan laga decoupage kurishey.
Itu workshop toh hoiley Vilenuo Kapu para chair kurishey, kun toh hoiley District Mission Coordinator, District Hub Empowerment for Women (DHEW) asey. Tatey pura puri 35 trainee khan itu workshop tey attend kurishey.
Add Comment