Varun Dhawan aro Natasha Dalal para chukri baccha paisey

New Delhi, June 04 : Varun Dhawan aro Natasha Dalal tu ama-baba hoijaisey. Etu duijun couple para Monday(June 03) te taikhan laga first baccha, ekta chukri baccha ke duniya te welcome kurisey. Varun Dhawan para etu bhal khobor tu ekta animated video share kurikina announce kurisey kuntu te taikhan laga kutta Joey tu ekta board dhurikina thakisey kuntu te “Welcome lil sis” likhikina thakisey. Etu news ke instagram te share kurikina tai para likhisey, “Amikhan laga baccha ahisey. Sobkey ama aro baccha nimitey subh kamna diya karney dhanyabad di asey.” Ageyte, Varun laga baba aro director David Dhawan para etu news confirm kurisiley. Varun Dhawan aro Natasha Dalal para baccha bukha laga khobor tu etu saal laga February moina te announce kruisiley. Varun para Natasha ke January 24, 2021 te shaddi kurisiley. Taikhan duijun tu shaddi laga kosom exchange kuribole ageyte bisi saal date kurisey. Taikhan laga shaddi tu private thakisey kuntu te taikhan laga close sathi khan aro parivar khan attend kurisey. Kareena Kapoor laga chat show te interview kora homoitey Varun Dhawan para Natasha logotey tailaga relationship laga kotha kurisey. Tai para koisey, “Tai Natasha ke first time Class 6 thaka homoitey lok paisey. Taikhan duijun tu Class 11 nohoile 12 tak friends thaksiey. Taikhan duijun bisi close friend thakisey. Tai Natasha ke dikha laga din yaad asey, aro jitya tai utu din te Natasha ke dikhisey tai tu taikey khusi paijaisey.” Varun Dhawan ke action film ‘Baby John’ te dikhibole asey kuntu ke A Kaleeswaran para direct kurisey aro Atlee para Jio Studios aro Cine1 Studies logotey milikina present kurisey. Tai tu Samantha Ruth Prabhu laga opposite te Hollywood series ‘Citadel’ laga Indian adaptation te bi dikhibole asey.