Salman Khan para AR Murugadoss laga ‘Sikandar’ film nimitey shooting suru kuridisey

New Delhi, June 19 : Salman Khan para tailaga film ‘Sikandar’ laga shooting suru kuridisey. Tai para etu news tu etu film shoot kora jaga laga ekta behind-the-scene picture share kurikina confirm kurisey. Salman Khan tu etu movie te main role kuribole asey. Etu film ke AR Murugadoss para direct kuribole asey. AR Murugadoss tu Aamir Khan laga film ‘Ghajini aro Akshay Kumar laga film ‘Holiday: A Soldier Is Never Off Duty’direct kora nimitey popular asey. ‘Sikandar’ film tu theatre te Eid 2025 te release hobole asey. Etu film ke Sajid Nadiadwala laga banner Nadiadwala para produce kuribole asey. Etu film te ‘Pushpa : The Rise’ film laga actress Rashmika Mandanna bi asey. Salman Khan aro Rashmika Mandanna tu first time eksath ekta film te kaam kuribole asey. Salman Khan laga akhri sobsey hit huwa film tu ‘Tiger’ thakisey. Aro Rashmika laga Animal’ thakisey. Eu duita film bi box office te bisi bhal perform kurisey aro 2024 laga sobsey bisi poisa kama film hoisey. SS Rajamouli laga dangor film ‘Baahubali te Kattappa laga role play kora Sathyaraj ke etu film te villain laga role nimitey chunisey. Hoilebi, etu film laga makers khan para etu laga official announcement kuribole baki asey.