Abhijeet Bhattacharya para koisey ki tailaga gana khan para Akshay Kumar ke ekta star banaisey

New Delhi, July 1 : Singer Abhijeet Bhattacharya laga hisap te Akshay Kumar aro Suniel Shetty nisna film star khan para success hasil kora nimitey tai credit pabo lagey. Abhijeet para ekta interview te koisiley ki Akshay Kumar tu poila te ‘gorib manu laga Mithun Chakraborty’ koikina jana jai thakisey. 1990s laga hit gana jaiseki Sheher Ki Ladki, Zara Sa Jhoom Lu Main aro bisi alag gana khan laga picheyte Abhijeet Bhattacharya laga awas asey. Tai para koisey ki tai tu khali stars(mashoor actor) khan nimitey hey gana kuribole banisey. Akshay Kumar tu Bollywood laga ekta sobsey successful actor majotey asey. Aro entertainment industry te duniya laga sobsey ameer manu khan laga list majotey tailaga naam bi olai thakey. Tai para enaka koisey, “Amilaga music para Akshay Kumar ke ekta star banaidisey. Jitya tai launch hoisiley, tai ekta star bi thakanai. Taikey etu ageyte ‘Dukhiya manukhan laga Mithun Chakraborty’ koikina mati thakisey. Music tu eman shaktishali asey ki chahey Dev Anand, Raj Kapoor nohoilebi Rajesh Khanna hobi gana para ekta actor ke star(mashoor) banaidibo parey. Akshay tu Khiladi film picheyte ekta star hoisey aro etu picheyte tailaga sob film laga title Khiladi dhalisey(Khiladi film nimitey Abhijeet para bisi mashoor gana gaisiley). Amilaga awas tu etu sob film nimitey suit kurisey. Etu actor khan asey kun poila te mashoor thakanai hoilebi amilaga gana khan para taikhan ke mashoor banaidisey.” Abhijeet ke recently Indian Idol 12 laga ekta episode te dikhisiley. Etu picheyte tai para etu show laga judge khan tu experience nathaka khan asey koikina koisey.