Vivek Oberoi laga film khan hit huwa laga bawajut tai acting job pa bon hoijaisey koisey

New Delhi, July 09 : Actor Vivek Oberoi, kun ke akhri bar Rohit Shetty laga film Indian Police Force te Sidharth Malhotra aro Shilpa Shetty logotey dikhisey. Tai para tai business aro investment te gusa laga bari te discuss kurisey. Tai para koisey ki tai tailaga dhyan business te titya shift kurisey jitya Bollywood te tai mushkil jheli thakisey aro movies aro events khan para tailaga income aha tu sukhi jaisey. ABP Live logotey kotha kurithaka homoitey Vivek Oberoi para koisey ki tai acting career suru kuribole ageyte, tai US te puribole nimitey poisa kamabole aro bacchabole te focus kurisey. Tai para koisey ki tailaga kamayi barija picheyte, tai stock market te poisa invest kora suru hoisey aro etu kuribole karney brokers khan para training paisey. Tai 16 nohoile 17 years thaka homoitey ekta stock market portfolio suru kurisey.Vivek tu tailaga acting career laga sobsey uccha thag te thaka homoitey bi business te invest kuri thakisey. Tai para koisey, “Amki wapas ahikina ekta actor hoisey aro  Company aro Saathiya film kurisey. Life tu bisi bhal thakisey, hoilebi ami poila para ekta investor hobole mon thakisey. Hoilebi ami tu ekta active businessman hoijaisey. Etu para amikey modod kurisey.”Tai para koisey ki kinaka tai tailaga acting nimitey critics(film khan laga bari te taikhan laga opinion diya manu khan) para tarif pa laga bawajut bi tai acting laga opportunity napa hoisey. Aro etu para taikey business te focus kuribole encourage kurisey.  Vivek para koisey ki tailaga acting career thik nuchuli thaka homoitey, tailaga majboot para chuli thaka business para taikey stability aro poisa laga security disey. Tai para aji tak 29 company te poisa invest kurisey.