August 09, 2024: Dengue laga case khan bishi uthi jai thaka para, itu Country laga alag alag jaga khan tey, aru 2024 toh hoiley sob para biya wala saal thakishey, dengue case khan laga/ fatality khan toh record kuri kena asey itu state tey, itu National Vector Borne Diseases Control Pragramme (NVBDCP) para itu Christian Institute of Health Sciences aru Research (CIHSR) Chumoukedima logotey collaborate kuri kena, ekta dui-din laga Dengue awareness programme organise kurishey, itu ‘Beat Dengue: Our health our responsibility’ laga theme under tey, CIHSR, Chumoukedima under tey, 08th August, 2024 tey.
Itu second din tey, District program Officer, NVBDCP, CMO Establishment, Dr. Kavito Zhimomi para itu public leader khan ke samjhaishey, itu community participation lagi thaka opor tey, dengue virus toh bishi para spread hoa toh rukhaboley. Tai para itu public leader khan ke, tai khan laga community, bosti khan aru colony khan ke encourage kuriboley koishey, itu sob mochor khan breed kuria laga jaga khan toh hatai diboley aru tai khan laga agey pichey phaney sob toh sukha aru sapha rakhiboley koishey, especially August, September & October laga muhina tey, virus toh spread hoa toh rukhaboley.
Peter Sangtam, Consultant NVBDCP, CMO Establishment para ekta report dishey, dengue vector opor tey, itu laga breed kuria jaga khan aru control kuria measure khan. Dr. Atsung Aier Sr. Consultant Community Health Department CIHSR para group discussion chulai jaishey, anti-dengue action plan laga.
MS CIHSR, Dr Bendangtoshi Jamir para opening address deliver kurishey, aru itu programme toh hoiley Quality Officer, CIHSR, Laishram Vidyalakshmi para chair kurishey.
Itu programme tey toh hoiley Dimapur, Chumoukedima aru Niuland district laga public leader khan para attend kurishey.
Add Comment