August 12, 2024: Itu International Youth Day laga part thaki kena, itu District AIDS Prevention aru Control Unit (DAPCU) Kohima para itu Nagaland State AIDS Control Society (NSACS) under tey, itu Marathon race – “Red Run” laga second edition organize kurishey, Red Ribbon Club member khan nimitey, Kohima district laga, kuntu toh hoiley 12th August, 2024 tey loishey. Itu toh hoiley ekta initiative asey, jawan chukra chukri khan ke engage kuri diboley, ekta healthy lifestyle tey aru physical activity khan tey, health maintain kuriboley aru lifestyle disease khan aru HIV/AIDS laga risk toh komti kuriboley.
Itu race toh hoiley Chief Medical Officer, Kohima, Dr. Leamnyie Konyak para flag off kurishey. Itu Chief Medical Officer para awareness banaboley lagi thaka emphasize kurishey, HIV/ AIDS opor tey aru ki, prevention toh hoiley ekta raasta asey, itu dangor bimar toh rukhaboley karney toh. Itu race toh hoiley TCP Gate para shuru hoishey aru Kohima Law College tey punchi kena khotom hoishey.
Itu Kohima district Marathon Race nimitey winner khan toh hoiley, nichetey di kena asey: Mota laga category tey- Kohima College laga Sha S first paishey,Sazole College laga Jeet Bahadur para second paishey aru St. Joseph’s College (Autonomous) laga Martemsu Aier third tey ulaboley parishey.
Maiki khan laga category tey – Kros College laga Hanthula T toh first paishey, Don Bosco College laga Z. Liyani Ezung para second paishey aru Orientation College laga Kuthulu toh third tey ahishey.
Dr. Chibenthung Kithan, District AIDS Control Officer DAPCU para itu winner khan ke award present kurishey. Itu winner khan ke toh hoiley ekta certificate aru cash prize present kurishey, Rs 5000. Rs 3000 aru Rs 2000 laga, itu mota aru maiki duita laga category tey bhi.
Add Comment