New Delhi, August 14 : Kangana Ranaut laga release hobole thaka film ‘Emergency’(kuntu ke tai para direct kurisey aro kotey tai Indira Gandhi laga kirdar nibhai asey) etu laga trailer launch te tai para media logotey baat-chit kurisey. Ekta sawal laga jawab dikina, Kangana para Bollywood laga 3jun sobsey mashoor Khans – Shah Rukh Khan, Salman Khan aro Aamir Khan laga bari te tai ki hosa te ki bhabna korey etu share kurisey.
Kangana para koisey, “Ami sob 3jun Khan logotey ekta film produce aro direct kuribole khusi pabo. Aro ami taikhan laga talented side bi dikhabole khusi pabo, kotey taikhan act kuribo paribo aro bhal bi dikhibo. Aro taikhan para kiba ekta bi kuribo pabo, kuntu tu society nimitey bisi jaruri asey. Ami enaka type laga film banabole mon asey. Kilemaney ami ke lagey ki taikhan sob tu bisi talented asey.”
Kangana para etu picheyte Bollywood te tailaga favourite Khan kun asey etu reveal kurisey. Kangana, kun para bisi bar Shah Rukh aro Aamir Khan laga khilaf te kotha kurisey tai para koisey, “Taikhan ki kuri asey etu tu, hoi, taikhan para film industry te bisi poisa kamaikina di asey aro amikhan tu taikhan ke hodai karney dhanyabad hobo lagey. Aro, taikhan tu enaka bisi manu khan logotey engage kuri asey kun khan ke enaka engagement laga dorkar asey. Ami laga hisap te, taikhan sob 3jun(Shah Rukh, Aamir aro Salman) logotey ekta bisi creative(kalakari) side asey, kuntu ke khali ekta duita film laga alava dusra te explore koranai. Aro ami para taikhan aro bisi dusra actor khan logotey etu explore kuribole mon asey. Ekjun actor kun ke direct kuribole napa nimitey ami hodai regret kuri thakey etu actor tu Irfan Khan sahib asey; tai amilaga favourite Khan majotey ekjun asey aro ami taikey hodai miss kuribo.”
Add Comment