Salman Khan aro  Bhagyashree laga film ‘Maine Pyar Kiya’ tu cinema te re-release hobole asey

New Delhi, August 18 : Salman Khan aro Bhagyashree laga blockbuster romantic film ‘Maine Pyar Kiya’ tu 35^th anniversary manabole nimitey theatre te re-release hobole asey. 1989 te release huwa picheyte etu film laga main character Prem(kuntu laga role Salman Khan para kurisey) aro Suman(kuntu laga role Bhagyashree para kurisey) tu bisi mashoor hoisiley. Aro etu duijun tu audience khan laga mon jitibole nimitey aro ekbar cinema te ahia sey. ‘Maine Pyar Kiya’ film bana, Rajshri Productions para etu khobor tu Saturday din te social media account te disiley.  Etu film ke Sooraj Barjatya para direct kurisiley. Etu film tu ekta romantic drama asey kuntu te ekta jawan chokra aro chukri laga love story dikhai. Kun first te sathi-sathini thakey aro picheyte ek-dusra laga morom te girey. Chokra tu ameer khandan para thakey aro  chukri laga parivar tu gorib thakey kuntu nimitey shaddi te badha ahey. Chokra(Prem) tu tailaga baba laga ghor charidikina nijor para poisa kamabole kosis korey taki tai tailaga morom kora maiki, Suman logotey thakibo paribo. Salman aro Bhagyashree laga alava etu film te, Mohnisn Bahl, Reema Lagoo, Alok Nath, Laxmikant Berde aro Ajit Vachani bi main role te asey.