Rajinikanth laga film Vettaiyan laga release date olaisey

New Delhi, August 19 : Jailer aro Lal Salaam picheyte, Rajinikanth tu tailaga next film ‘Vettaiyan’ release kuribole nimitey pura tayar asey. Etu film ke TJ Gnanavel para direct kurisey. Etu film tu October 10, 2024 te cinema te release hobole asey. Aro Suriya laga film ‘Kanguva’ logotey clash hobole asey. Etu tu box office te ekta bisi dangor clash hobole asey. Kilemaney Tamil film industry laga etu duita film tu one-on-one jabole(matlab ek-dusra logotey mukabala kuribole) asey. ‘Vettaiyan’ film te haath thaka banner Lyca Productions para etu film laga release date announce kurisey aro etu film laga lead star laga poster bi release kurisey. Etu film tu duniyabhor te October 10 te release hobole asey

Etu film tu cinema te Tamil laga alava,  Hindi, Telugu aro Kannada bhasa te release hobole asey. Rajnikanth laga alava etu film te Amitabh Bachchan, Fahadh Faasil, Ritika Singh, Manju Warrier aro Rana Daggubati bi main role te asey.

Vettaiyan tu Rajinikanth laga 170^th film asey. Ageyte, Lyca Production company para Rajinikanth laga 73^rd birthday din te etu film laga title teaser release kurisiley. Anirudh Ravichander para etu film laga music compose kurisey.

Dusra fale Tamil star Suriya laga film Kanguva te Disha Patani, Bobby Deol aro Yogi Babu bi main role te asey. Enaka khobor  paisey ki Kanguva tu Rs 300-350 crore laga dangor budget te banaisey.